Бепуштликдан азият чекиб юрган эркак ва аёлларимизга маслаҳат – бир ҳафтаси ўтиб кетишга улгурган июнь ойида фаолроқ бўлинг. Нима учун дейсизми? Қишда совуқдан толиққан танамиз баҳорда ҳам кўп тиклана олмайди, чунки табиатдаги куч-ғайрат ва энергиянинг аксарият қисми ўт-ўлан ва дарахтларни кўкартириш, оламни жонлантиришга сарфланади. Ёзнинг биринчи ойи эса ишқий муносабатлар учун айни муддао. Табиат ҳам жонланиб бўлган, демак, одамларнинг фаоллигига ҳеч нарса ҳалақит қилмайди. Бунинг устига жорий йилдаги каби нисбатан совуқ ва ёғингарчиликка бой келган баҳор ҳам ниҳоясига етиб, ўрнини иссиқ ва қуёшли ёзга бўшатиб беради. Иссиқ мавсумда эса қайноқ эҳтиросларга нима етсин?! Буни британиялик олимлар ҳам исботлашди.

Уларнинг таъкидлашича, июнь жуда эҳтиросли ой экан. Тадқиқотларнинг натижалари шуни кўрсатдики, ёзнинг биринчи ойида аёлларнинг ҳомиладор бўлишга мойиллиги кучлироқ бўларкан. Бу табиат томонидан аёлларга киритилган ўзига хос «дастур» билан изоҳланади. Чунки июнда ҳомиладор бўлган хотин баҳорга келиб фарзанд кўради. Бу эса болакайнинг омон қолиши учун катта имкониятлар беради. Тиббиёт ва цивилизация ривожланган ҳозирги замонда ҳар қандай мавсумда туғилган бола соғлом ҳаёт кечиради, дейишингиз мумкин. Аммо гап минг йиллик табиий жараён ҳақида бормоқда. Зеро, қадим ўтмиш замонларда совуқ мавсумда туғилган фарзандларнинг, табиийки, шамоллаш эҳтимоли юқори бўлган. Натижада уларнинг аксарияти табиий танлов натижасида касалманд ўсишган. Бунинг олдини олишга интилган одамлар иложи борича иссиқ вақтда фарзанд кўришга интилишган. Охир-оқибат бу аёлларимизнинг генига сингиб кетган – баҳорда туғилган болакай соғлом ўсади. Бепуштликдан даволанаётган оналар ҳам бошқа ойларга қараганда айнан июнь ойида 25 фоизга кўпроқ ҳомиладор бўлишларини ҳам британиялик олимлар исботлашди.