Модага қараб оёқ босадиган аёлларни кўзни юмиб туриб қандай тез аниқлаш мумкин? Атирининг ҳидига ёки бошқа эркакларнинг «оҳ-воҳларига» қараб дейишингиз мумкин ва бу гапларингизда жон бор, албатта. Лекин тез аниқлашнинг энг оддий усули – туфлисининг тақ-туқидан. Ҳали аёл (табиийки, унинг «атири» ҳам) эшикдан кирмаган ва ён атрофдаги эркакларнинг кўзига кўринмаган бўлса ҳам, узун пошнанинг полга урилгандаги товуши етти чақирим наридан эшитилади. Отнинг тақаси ҳам бу қадар узоқдан танилмаса керак. Аммо модага учган баъзи оёғи оғир хотинлар ҳатто ўша оғир оёғига ҳам пошнали туфли кийиб олганига нима дейсиз? Ортопедлар бундай «модага ўчликни» қатъий қоралаб чиқишди.

Биз баъзиларга ўхшаб аёлларимизнинг паранжи кийиб юришлари тарафдори эмасмиз. Соҳибжамол аёлларимизнинг ўзига ярашган кийимни қойилмақом кийиб юришганларини кўриб кўзимиз қувонишини хоҳлаймиз. Хотин-қизлар ўтмишда бундай кийинишмаган, деб ўйлайдиган эркакларнинг ўзлари яхтак ва ковуш кийиб юраверишсин. Бундай аёлларимизни кўрган эркаклар ёмон фикрларга берилиши тайин, деб ўйлаганлар шуни эсдан чиқармасликлари керак: одам ҳайвондан шуниси билан фарқланадики, ўз хоҳиш ва ҳирсини ўзи бошқаради. Ҳирсига ҳаддан ташқари берилганларни эса асл инсон деб аташга тил бормайди.

Аммо биз асосий мавзудан четга чиқиб кетдик. Хуллас, замона русумига берилган аёлларимиз буни ўз соғлиқлари эвазига қилмасликларини сўрардик. Ахир соғлом тана ҳам саломатликнинг бир кўриниши эмасми? Тиббиётчиларнинг қатъий таъкидлашича, баланд пошнали туфлилар ҳомиладор аёлларнинг соғлиғи учун кони зиён экан. Тез орада чақалоқнинг йиғисини эшитишни хоҳлаган оналаримиз учун энг баланд пошна – атиги 3-5 сантиметр бўлиши лозим. Акс ҳолда ҳам оёқлари, ҳам умуртқа жароҳатланишига дучор бўлишлари ҳеч гапмас. Фарзанд кўришни истаган аёл танаси жиддий ўзгаришларни бошидан кечиради. Мисол учун, оёқ бўғимлари юмшоқ ва чўзилувчан бўлиб қолади, тўпиқлар ҳам ўта сезгирлашади. Шу билан бирга ҳомиладор аёлларнинг қомати ва вазни ортади. Натижада умуртқага тушаётган оғирлик анча кўпаяди. Узун пошна билан уни янада қийнашга ҳожат борми?