Уйда болакайнинг кулгуси ва, айниқса, йиғиси эшитилиши, таниш мақол тили билан айтганда «боласиз мозорни болали бозорга айлантириш» учун ёш куёв белни бақувват қилиб ишга киришса ҳамки, рафиқасининг ҳеч боши айланмаяпти, «жин тепсин» тестнинг оқ чўпчаси ҳеч қизилга бўялмаяпти. Гинеколог доктор келинни минг текшириб, ҳаммаси яхши эканлигини таъкидламоқда. Энди навбат куёв болага.

Доктор унинг спермасини текширар экан, қуйидагиларга эътибор беради:

ҲАЖМИ. Сперманинг 2-6 мл бўлиши ҳомиладор бўлиш учун айни муддао.

Ph-ФАКТОР. Таҳлил этилаётган суюқлик ишқорли бўлиб, кислоталилик кўрсаткичи (ph-фактор) юқори бўлса, везикуляр функция бузилганидан далолат беради. Хуллас, тухум оқини кўпроқ ейиш тавсия қилинади.

МИҚДОРИ. Сперманинг 1 мл да 20 млн. дан (умумий ҳажмида эса 80 млн. дан) кам сперматозоид бўлса, мақсадга мувофиқ эмас. Бу камлик қилади.

ҲАРАКАТЧАНЛИК. Сперматозоидлар тўғри йўналишда ҳаракатлана билиши жоиз. Улар ҳаракатчанлиги А дан Г гача шкалада ўлчанади. Кичкинтойларга В ёки Г «тамғасини» қўйишса, ҳаракатчанлиги суст. «Жадал фаоллик»нинг меъёрдаги кўрсаткичи – 50%.

ШАКЛИ. Соғ спермада камида 15% сперматозоидлар анъанавий шаклга эга бўлади. Катта бошли, йирик сузувчанли, вергул шаклидаги «шошқалоқлар» маррага етиб бориши қийин.

ЭҲТИМОЛЛИК. Юқоридаги барча омилларни жамлаб, таҳлилга эҳтимоллик индекси белгилашади. 75% бўлса, ёмон эмас. Муҳими, бундан паст бўлмасин!

Фарзандли бўлишни истаган эркаклар учун 10 маслаҳат

1 Шошқалоқлик самара бермайди, деган нақл бу ҳолда кўп ҳам ўринли эмас. 45 ёшдан кейин сперманинг сифати анча пасаяди. Шундай экан, Саксонвой ва Тўқсонвойларнинг туғилишини фавқулодда ҳодиса деб билмоқ керак.

2 Чекишни ташлаган маъқул, тамаки «кичик ғаввослар» умрини анча қисқартиради.

3 Алкоголь ва, айниқса, гиёҳвандлик кони зарар. Буни кўп эшитган бўлишингиз мумкин, лекин улфатлар билан бир оқшомда «қиттай-қиттай» қилиш сперматозоидларни нақд уч ҳафтага ногиронга айлантириши мумкин. Чунки соғлом сперма ишлаб чиқиш учун организмга 12 ҳафта муддат зарур.

4 Машина ўриндиғига иситиладиган чойшаб олишга шошилманг. Тор шим (хуллас, белдан пастини қисиб турадиган кийим) кийиш ёки тинмай идора стулида ўтириб ишлаш натижасида баъзи органларни ҳаддан ташқари иситиб юбориш мумкин. Бу эса ножоиз оқибатларга олиб келади. Шу ўринда иссиқ ванналар қабул қилиш ва ноутбукни оёққа қўйиб ишлатиш ҳам мақбул эмас.

5 Жинсий яқинлик фарзандли бўлиш учун асос яратади, десак ҳайрон қолмассиз. Лекин бундай яқинлик тез-тез бўлгани яхши. Агар узоқ вақт сақланиб, кейин биттада ҳаммасининг ҳиссасини чиқарсам, нур устига аъло нур бўлур, деганлар чучварани хом санаш тугул, ун ва гўшт харид қилиш учун ҳали бозорга ҳам чиқмаган кўринади. Ҳафтасига беш марта – мана буни тўғри йўл деса бўлади.

6 Қорин қўйиб, бақалоққа айланганлар эҳтиёт бўлишсин. Ёғ баданни иситади, иссиқлик эса салбий таъсир қилишини юқорида айтиб ўтдик. Шундай экан, дарҳол озиш йўлини қидиринг.

7 Сперма жуда узоқ масофа йўл босади (тасаввур қилинг, бизнинг оламда бу 60 километрга мутаносибдир). Бу масофани босиб ўтишга атиги 15-20 дақиқа вақт сарфлайди. Унинг ҳаракатига гравитация ва ишқаланиш тўсқинлик қилади. Шундай экан, унга қўлдан келганча ёрдам бериш керак. Масалан, аёл 20-30 дақиқа белини кўтариб ётса ҳам катта ёрдам (қачонлигини айтиб ўтиришнинг ҳожати бўлмаса керак).

8 Асаббузарликка қарши ҳар қадамда ва ҳар сонияда курашинг. Унинг бевосита таъсири ҳали етарлича ўрганилмаган бўлса-да, доимий асаббузарликда юрган эркакларда тестостерон даражаси кескин пасайиши фанга маълум.

9 Парҳез ҳақида ҳеч ўйлаб кўрганмисиз? Агар организмда соғлом авлод қолдириш учун ҳамма моддалар етарли бўлса, бу ҳақда гапириб ўтиришнинг ўзи ножоиз. Шунинг учун музлатилган ёки муддати ўтиб кетган «қоришмалар»ни қоринга ургандан кўра, тўғри овқатланиб, яхши мультивитамин ичган афзал. Буларнинг таъсири бир неча ойдан кейин кўринади – буни эсдан чиқарманг.

10 Асосийси, эр-хотин орасида муҳаббат ва эҳтирос сақланиб қолиши зарур. Эсингиздами, тўйдан аввал кечқурун келаётганингизда осмондаги ой ва юлдузларни томоша қилганингиз, деярли ҳар учрашувга гул билан келганингиз. Ўша пайтдаги ҳиссиёт қанчалик узоқ сақланса, шунчалик зўр бўлади. Бу жараёнга мажбурият ёки ишдан кейинги посбонлик, деб қараш нотўғри. Севинг ва севилинг, бу фарзандли бўлиш учун энг яхши замин.

Агар юқоридаги маслаҳатларга риоя этган ҳолда уч йил ичида фарзанд кўрмасангиз, докторга мурожаат қилиш керак. Афсуски, ҳамма нарса эру хотиннинг ўзигагина боғлиқ эмас.