Чиройли қоматли бўлиш сиз ўйлаганчалик мушкул эмас. Бунинг учун тонг саҳардан уйғониб, Тўйтепагача югуриб бориб келиш шарт эмас. Зарур нарсаларга «ҳа», баъзи нарсаларга эса, аксинча, «йўқ» дейиш ва бу фикрда қатъий туришнинг ўзи яхшигина ёрдам беради. Бўлиши мумкин эмас, дейсизми? Мутахассисларнинг маслаҳатларига бир диққат қилинг.

1. Кўп овқат ейиш сабабларини йўқотинг

Нима учун керагидан ортиқча овқат ейсиз? Балки зерикаётгандирсиз? Қўлингизга қошиқ олиш ўрнига анча пайтдан бери ўйлаб қўйган ишларингизни қилинг. Масалан, оилангиз шажарасини тузинг – менимча, кўпчиликнинг уйида ҳали шажараси бўлмаса керак. Ўзингиз таниган боболарингиздан бошлаб ҳозирги давргача – болаларингизгача ёзиб чиқинг. Бундан толиқсангиз, бироз ҳордиқ чиқаринг ёки яқин орадаги боғни айланиб келинг.

Ёлғизлик қийнаб юбордими? Эҳтимол, яқин дугонангиз ёки ён қўшнингизни чақириб, гаплашиб оларсиз? Ота-онангизга қўнғироқ қилинг, яқинларингизни кўриб келинг. Улар хабар олишларини кутиб ўтирмай, ўзингиз гўшакка қўл чўзинг.

Тушкунликка тушдингизми ёки хавотир оляпсизми? Балки нимадандир жаҳлингиз чиққандир? Агар уйқусизлик, кайфиятнинг тушиши, асоссиз ташвишлар қийнаб юборган бўлса, балки толиққандирсиз? Бироз ўринга ётиб, хотиржам бўлишга ҳаракат қилинг, ҳамма салбий нарсаларни бошингиздан чиқаришга ҳаракат қилинг. Зарур бўлса, ярим соатча мизғиб олсангиз ҳам бўлади.

2. Зарарли одатлардан халос бўлинг

Ликопчага солиб келишган таомни тўлиқ еб битириш, дастурхонга қўйилган нарсаларнинг барчасидан тотиб кўриш... Акс ҳолда мезмон хафа бўлади... Бундай эски урф-одатлардан воз кечинг. «Ул-бул нарсадан олиб ўтиринг» қабилидаги таклифларга рад жавобини беришга одатланинг. Мезбоннинг ўзи тинмай овқатни қоринга ураверса, бу унинг муаммоси. Сиз эса меъёрда овқатланишни ўрганинг ва ортиқчасига қўл ҳам узатманг.

3. Тубдан ўзгаришлар ҳар доим ҳам фойдали эмас

Оч қолиш, тезкор парҳезлар, мутахассис назоратисиз ортиқча жисмоний зўриқишлар – буларнинг ҳаммаси асаб, эндокрин, овқатни ҳазм қилиш тизимларига салбий таъсир кўрсатиб, улар фаолияти бузилишига олиб келиши мумкин. Гўзал қомат сари йўл равон ва назоратли жараёнга айланиши даркор.

4. Овқатланиш тарзига эътибор

Кунига 4-5 марта (3 марта асосий таом, 2 марта кичик тановул) ҳар 3-4 соатда овқатланишга ўрганинг. Семиз одамларнинг аксарияти кунига 1-2 марта овқатланади, бу модда алмашиниши жараёнини секинлаштиради. Узоқ вақт оч қолиш оқибатида тана ёғни парчалаш ўрнига уни тўплайди ва шу тариқа энергияни жамлашга ҳаракат қилади.

Фақат очлигингизни ҳис этсангизгина овқатга ўтиринг. Таомга қўл чўзишдан аввал ҳақиқатан ҳам очлигингизга ишонч ҳосил қилинг. Бир парча нонни тасаввур этинг. Уни ҳозир ермидингиз? Шундай синов орқали ҳорин қанчалик таталаб кетганини билиш мумкин.

5. Овқатланиш одати

Ойнаи жаҳонни томоша қилаётганда ёки ўринда оёқ чўзиб ётганда овқатланиш бундай вазиятга кўникиш ҳиссини беради. Кейинги сафар ҳам телевизорни ёққанда ёки ўрнингизга ётганда овқат ейишга эҳтиёж туғилади. Ҳаётда ҳамма нарсанинг ўз ўрни бор. Остонада ётиб олиб ухлаш кимнинг ҳаёлига келади, дейсиз? Ёки дастурхон атрофида чўмилган одамни кўрганмисиз? Нима учун дуч келган жойда овқатланиш керак?

Уйда фақат дастурхон атрофида ўтириб, ҳамма жамул-жам бўлганда тановул қилишга ўрганинг. Чиройли дастурхон ва қулай идишлар харид қилинг. Дастурхонни чиройли безатинг, буларнинг барчаси иштаҳа яхши бўлишини таъминлайди.

Маҳсулотларга келсак, ҳамма нарсани ейиш мумкин, фақат меъёрни билсангиз, бас.

6. Ўзингизни севинг

Тарози қандай рақамни кўрсатишидан қатъи назар ўз танангизни яхши кўринг. Бўшаштирувчи ванна, уқалаш ва бошқалар озиш жараёнининг ёқимли бўлишига кўмаклашади. Кўзгуга қараб ўзингизни яхшилаб кузатинг. Танангизда 10 та афзаллик топишга интилинг ва кейинчалик уларга кўпроқ эътибор беринг. Ўзингизга эътиборли бўлинг. Тез-тез ўзингизга дам беринг, қанчалик ажойиб эканлигингизни унутманг. Ўзингизга нисбатан сабрли, эътиборли ва ҳурматли бўлсангиз, кайфиятингиз кўтарилади, қоматли бўлишингизда қўл келади.