14 февраль Валентин кунимиш. Бу кун севшинганлар бахт топармиш. Ўзи бу байрам Европа халқларига тааллуқли . Ўзбекларда-чи, борми бу байрам? Ўзбекни байрам қилганини кўрганмисиз? Ман гувоҳман шунақа байрамга. Пайшан-балик! Ҳар ҳафтада пайшанба. Йилда 52 ҳафта бўлса, 52 марта Валентин куни.. эй.. севишганлар байрами. Шу куни эр бошлиқларни кўзини шамғалат қилиб, чойхонага бормай, тўғри уйига югуради. Ахир пайшанба. У европаликларга ўхшаб йўл-йўлакай гул бозоригамас, откритка сотиб олиш учун киоскагамас, гўшт бозорига шўнғиб чиқади, айнан гўшт бозорига.

 

- Ўлинг, Худоё, улгурдизми? Энди мошхўрда қилмоқчийдим, - дейди эшикни очган хотини қўлидаги капгирга қараб.

- Э, мошхўрдага бало борми, хотин, бугун пайшанбалигини унутдингми? Ошга унна! - буйруқ беради эр.

- Ўғлим, дарсингни қилиб бўлдингми, - дейди ота ошдан кейин шумтака ўғлига.

- Ҳаммасини қилдим, дада. Хатто адабиётдан берилган шеъргача ёдладим, - дейди ота ўғил телевизорда берилаётган Голливуд киносини охиригача кўриш илинжида.

- Қилган бўлсанг - марш ухлагани!

- Дада.. шу кинони охиригача кўрий.. қизиқ экан.

- Марш дедим. Эрталаб кўзингни очомийсан, - ўғил билмайдики, бугун пайшанба.

- Дадажон, қурбақани расмини чизиб беринг, - дейди тўрт ёшли қизалоғи қўлида қалам-қоғоз билан.

- Дадажониз чарчаб келганла, асалим, эртага чизиб берадила, - дейди онаси.

- Яша, хотин, - дейди қизини ухлатгани олиб кириб кетаётган хотинининг орқасидан эснаркан. - Олдинда ҳали тошбақани расмини чизиб беришим керак. - Вазифасиде, ахир бугун пайшанба.

Ўзи шу европаликларга ҳайронман. Келиб-келиб йилда атиги бир марта севишганлар байрами қилишади. Шунинг учун уларда туғилиш кам, генофонди кемтикликка юз тутиб, йилда 52 марта севишганлар кунини нишонлайдиган осиёликлар эмиграцияси ҳисобига аҳоли сонини ўстиришмоқда. Мана сизга оқибат! Азиз европалик биродарлар, ўша севишганлар байрамини йилда биттамас, кўпроқ қилиш йўлини излаш керак. Ия, Валентин байрами муносабати билан ҳажвия ёзаман, деб соат тўрт бўлиб қолганини сезмабман. Ахир бугун пайшанба-ку. Гўшт бозорига ўтиш керак. Майли, биродарлар.