Гарри Поттер ҳар жиҳатдан ғайриоддий бола. Бошқа ўқувчилардан фарқли ўлароқ ёзги таътил даврини ёқтирмаслиги унинг ўзгача эканлигидан далолат беради. Гарри ушбу даврга берилган уй вазифаларини виждонан бажаришга интилади, бироқ бу иш билан яширинча, фақат тунда шуғулланишга мажбур. Бунинг устига у сеҳргар.

Жоанна Кэтлин РОУЛИНГ,
асар муаллифи,
Буюк Британиялик болалар ёзувчиси

Мария Викторовна СПИВАК,
инглиз тилидан рус тилига ўгирган россиялик таржимон

Шокир Зокирович ДОЛИМОВ,
рус тилидан ўзбек тилига ўгирган
ҳарбий таржимон

ЎН БЕШИНЧИ БОБ.

КВИДИШ БЎЙИЧА ФИНАЛ ЎЙИНИ

- У... мана буни юборибди.

Гарри Гермиона узатган хатни қўлига олди. Йирик ёш томчилари томган қоғоз саҳифасидаги сиёҳ ёйилиб кетган бўлиб, ёзувнинг баъзи сўзларини илғаб олиш жуда қийин кечди.

Қадрли Гермиона!

Биз ишни ютқазиб қўйдик. Отбургутни «Хогварц»га олиб кетишга ижозат берилди. Лондон гиппогрифимизга жуда ёқди. Яхшиликларингни ҳеч қачон унутмайман.

Хагрид.

- Улар бундай қила олишмайди, - ишонмай шивирлади Гарри, - Қатл қилишга журъат этишмайди! Отбургут хавфли ҳайвон эмас!

- Фикримча, Малфойнинг отаси дағ-даға қилаверганидан қўрқиб кетган қўмита аъзолари шундай ҳукм чиқаришга мажбур бўлган, - деди Гермиона кўзини артиб, - Дўқ-пўписа масаласида мистер Малфой устаси фаранглигини биласизлар-ку. Қўмита эса бир ҳовуч ақли заиф қариялардан иборат. Уларни чўчитиш Малфойнинг отаси учун чўт эмас. Ҳукмдан норози бўлиб, шикоят аризасини бериш мумкин, шундай қиламиз ҳам, албатта. Бироқ ростини айтадиган бўлсам, бундай чора бирон-бир наф беришига умид қилмайман... Шикоят ҳеч нарсани ўзгартирмайди.

- Йўқ, ўзгартиради, - ғазаб-ла баёнот қилди Рон, - Бу сафар сен ёлғиз ўзинг шуғулланмайсан бу иш билан, Гермиона. Мен сенга ёрдам бераман.

- О, Рон!

Гермиона ўзини йиғидан тўхтата олмай иккала қўли билан Роннинг бўйнига таянди. Кутилмаган бундай ҳолатдан ўзини ноқулай сезган Рон Гермионанинг бошини силаб қўйди. Ниҳоят қизалоқ ўзини нари тортди.

- Рон, чин сўзим, Қасмоққа жуда ачинаман... - деди у йиғи орасида.

- О!... У... У жуда қариб қолган эди, - жавоб қайтарди Рон, ўзини идора қилиб, - Умуман олганда ҳақиқатан ҳам ундан ҳеч бир наф бўлмаган. Ота-онам бойқуш олиб беришар энди, ким билади.

Блэкнинг иккинчи босқинидан сўнг жорий этилган хавфсизлик чоралари Гарри, Рон ва Гермионага кечалари Хагриднинг кулбасига ташриф буюриш имконини бермади. Энди у билан фақат сеҳрли ҳайвонларни парвариш қилиш фани дарсида гаплашиш мумкин холос.

Гиппогриф юзасидан чиқарилган ҳукмдан руҳий ларзага келган Хагрид, ҳамма нарсага лоқайд бўлиб қолган.

- Ўзим айбдорман. Қора коржома кийиб олган қўмита таркиби мени қуршаб олишган... мен эса ўртада, худди тилимни ютиб олгандай қоғоз титиб ўтирдим... сир босиб, сен ёзиб берган саналарни ёдимдан чиқариб қўйибман, Гермиона... Шундан сўнг Люциус Малфой сўзга чиқди. Малфой ўзининг оташин нутқида нима тайинлаган бўлса, қўмита аъзолари шундай иш тутишди...

- Ҳукмдан норози бўлиб, шикоят аризасини беришимиз мумкин-ку ҳали! - бақирди ҳиссиётга тўлган Рон, - Шошма, таслим бўлишга ҳали эрта, биз бу борада тегишли иш олиб боряпмиз!

Улар айни вақтда бошқа ўқувчилар билан биргаликда қаср томон боришмоқда. Олдинда, Краббе билан Гойлнинг ўртасида Драко Малфой одимлаб кетяпди. У кескин тўхтади-да, ўзининг мурдор табассуми билан Гарри ва унинг дўстлари томон юзланди.

- Фойдаси йўқ, Рон, - маъюс хўрсинди Хагрид, қасрнинг асосий кириш эшиги бўсағасига етгач, - Қўмита яна Люциуснинг чўнтагига қараб иш тутади. Ундан кўра Отбургут ўзининг сўнгги кунларини хурсандчиликда ўтказиши учун ҳаракат қилай. Қолаверса, бу менинг бурчим...

Қаср эшиги ёнида тўхтаган Малфой, Краббе ва Гойл ҳамма гапни эшитиб туришди. Хагрид юзини тез ўгириб олди-да, улкан дастрўмоли билан бекитиб олди.

- Қаранг-а, қандай кўз ёш оқиза бошладик! Бунчалик ночор ландавурни ҳаётингизда ҳеч учратганмисиз? - ғижиниб ғулдиради Малфой, - Яна ўқитувчи эмиш!

Гарри билан Рон Малфойга ташланди. Бироқ Гермиона улардан эпчиллик қилиб, бор кучи билан Малфойнинг башарасига туширди. Кутилмаган зарбадан Малфой турган жойида гандираклаб қолди. Гарри, Рон, Краббе ва Гойл эса худди яшин ургандай серрайиб қолишди. Гермиона боз қўлини кўтарди-да:

- Ҳеч қачон Хагридни ожиз дея кўрма, тушундинг-ми, сен... жирканч... ифлос...

- Гермиона! - паст овозда хитоб қилди Рон, қизалоқнинг қўлини ушлаб қолишга уриниб.

- Тегма менга, Рон!

Гермиона сеҳрли таёқчасини чиқарди. Малфой ортга тисланди. Вужуди акашак бўлиб қолган Краббе билан Гойл Малфойнинг буйруғини кутишди.

- Кетдик бу ердан, - ғулдиради Малфой.

Бир неча сониядан сўнг учаласи қаср остига кириб, кўздан ғойиб бўлди.

- Гермиона! - яна хитоб қилди Рон.

Унинг овозида ҳайрат ила завқ оҳанги уйғунлашиб кетди.

- Гарри, илтимос, финал ўйинида хароб қил уни! - деди Гермиона жарангли овоз билан, - Шундай қийратгин-ки, шарманда бўлсин! «Слизерин»нинг ғалабасига бардош бера олмайман!

- Афсун ўқиш дарсига борадиган вақт бўлди, - эслатди Рон, ҳалигача йирик тангадай очилган кўзлари билан Гермионага тикилиб, - Кетдик.

Учовлон ҳашаматли мармар зинапоя бўйлаб тез кўтарилиб, профессор Флитвикнинг хонаси томон йўл олишди.

Гарри эшикни очиши билан профессорнинг таънаси эшитилди.

- Кечикяпсиз, йигитчалар! Қани тез кириб, сеҳрли таёқчангизни қўлингизга олинг-чи. Бугун Хахолатиш тилсими ўзлаштирилади. Биз аллақачон жуфтларга бўлиниб, шай турибмиз...

Гарри билан Рон хона ичкарисидаги стол ёнига шоша-пиша бориб юк халталарини очишди. Орқага ўгирилиб қараган Рон Гарридан сўради:

- Гермиона қаёққа гум бўлиб қолди?

Гарри ҳам ўгирилиб, Гермионани топа олмади. Эшикни очганда орқада турган эди-ку.

- Қизиқ, - деди Гарри Ронга бақрайиб, - Балки... ҳожатхонага ёки бошқа бирон жойга югуриб кетгандир.

Бироқ Гермиона дарсга келмади.

- Гермиона ҳам Хахолатиш тилсими ўзлаштириб олганида зиён қилмас эди, - деди Рон, дарс тугаб, эл қатори тушлик қилгани Катта Зал томон йўл олар экан.

Ҳамманинг оғзи қулоғида. Хахолатиш тилсими ўқувчиларнинг қалбига ҳаётдан чексиз мамнунлик ҳиссини бахш этган.

Гермиона тушлик қилгани ҳам келмади. Олмали пирогни еб тугатаётган Гарри билан Роннинг вужудидаги Хахолатиш тилсимининг таъсири аста-секин барҳам топгач, ташвишга тушиб «Гриффиндор» минораси томон шиддат билан йўл олишди.

- Нима деб ўйлайсан, Малфой Гермионага бирон-бир ёмонлик қилмадимикан? - хавотирланиб сўради Рон.

Икковлон соқчи-троллар ёнидан ўтиб, Семиз Холага паролни («Ғийбатчи аёл»ни) айтгач, портрет ортида очилган туйнук орқали коллежнинг умумий меҳмонхонасига кирди.

Курсида ўтирган Гермиона стол устидаги арифмантика дарслигига бошини қўйиб олганча, ухлаб қолибди. Болалар қизалоқнинг икки томонига ўтиришгач, Гарри уни сал туртиб уйғотди.

Гермиона бошини кўтариб, олазарак кўзлари билан атрофга қаради.

- Ним... нима бўлди? Вақт бўлди-ми? Ҳозир... Энди қайси дарсга борамиз?

- Башоратга. Фақат дарс бошланишига ҳали йигирма дақиқа бор, - жавоб берди Гарри, - Гермиона, нима учун афсун ўқиш дарсига кирмадинг?

- Нима?! О, йўқ! - оҳ урди Гермиона, - Ёдимдан кўтарилибди!

- Қандай ёдингдан кўтарилади? - ҳайрон бўлди Гарри, - Ахир сен биз билан синф хонасининг эшигигача етиб бординг-ку!

- Ишонгим келмайди! - ингради Гермиона, - Профессор Флитвикнинг роса жаҳли чиққан бўлса керак, а? Ҳаммасига Малфой айбдор. Ўша мараз ҳақида ўйлаб, фикр-хаёлларим аралашиб кетди!

- Биласанми, нима, - деди Рон, Гермионага ёстиқ вазифасини ўтаган каттагина арифмантика фани дарслигига назар солиб, - Фикримча, сен ҳаддан ортиқ зўриқиб кетгансан. Зиммангга жуда кўп нарсаларни юклаб олдинг.

- Ҳеч ҳам ундай эмасда! - деди Гермиона пешонасига тушган сочини орқага ташлаганча, юк халтасини қидириб, - Мен шунчаки баъзи нарсаларни чалкаштириб юбордим! Яхшиси бориб, профессор Флитвикдан узр сўраб келай... Башоратда учрашамиз!

Йигирма дақиқадан сўнг Гермиона болаларни чордоқдаги башорат синфига чиқиладиган ҳаракатчан кумуш нарвон остида қувиб етди.

- Хахолатиш тилсимини ўтказиб юборибман-а! Ўша тилсим имтиҳонга чиқарилиши ҳақида профессор Флитвик шама қилиб қўйди!

Улар ҳавоси дим, нимқоронғи хонага кўтарилди. Столлар устида ичи оқ-садаф тутунга тўлган биллур шарлар сирли шуъла сочиб турибди. Гарри, Рон ва Гермиона лиқиллаб қолган битта стол атрофига жойлашиб ўтиришди.

- Биллур шарлар кейинги семестрда ўтилиши керак эди шекилли, - ғудуллади Рон, яқин атрофда профессор Трелани бор-йўқлигига ишонч ҳосил қилиш учун бошини айлантириб.

- Ҳар қалай хиромантия деганлари тугабди-ку, - вайсади Гарри, - Ҳар гал кафтимга қараб, ҳашаротникига ўхшаш йирик кўзларини қисиб олишидан чарчадим!

Таниш сирли овоз янграб, одатдагидай, профессор Треланининг қоронғиликдан ғайритабиий чиқиб келиши рўй берди.

- Ҳаммага хайрли кун!

Сут рангидаги биллур шар нуридан юзлари ёришиб турган Парватти билан Лаванда завқланиб кетгандан титраб қўйишди.

- Биллур шарни режада кўзланган муддатдан олдин ўзлаштиришга киришганимиз маъқул, деб топдим, - маълум қилди оловга орқа ўгириб ўтирган профессор Трелани ўқувчиларга кўз югуртириб, - Қисмат илоҳаларининг менга берган хабарларига кўра, ушбу мавзу июнь ойида бўлиб ўтадиган имтиҳонга чиқарилади. Шу боис, мен сизларга амалий машғулотлар билан шуғулланишингиз учун имкон қадар кўпроқ вақт ажратишга қарор қилдим.

Гермиона истеҳзоли кулиб қўйди.

- Қаранг-а! Қисмат илоҳалари хабар берган эмиш!... - деди Гермиона, овозини оз бўлса ҳам пасайтирмай, - Имтиҳон мавзуларини ким тайёрлайди? Ўзи тайёрлайди-ку! Нақадар ажойиб башорат!

Гарри билан Рон кулиб юборишдан базўр тўхтаб қолишди.

Юзи кўланка остида ниқобланган профессор Трелани Гермионанинг пичингини эшитган-эшитмаганини айтиш қийин. Бироқ у ҳеч нарса эшитмаган каби гапини давом эттирди:

- Биллур шар воситасида фол очиш – алоҳида ва ниҳоятда нафис санъатдир. Сиздан бундай Шарнинг чексиз қаърига илк бор қарашингиз билан Кўра олишингизни ҳеч ҳам кутмайман, албатта. Биз ишни ички кўриш қобилиятингиз ва тасаввурингизни равшанлаштириш мақсадида ташқи дунёни кўриш ва онгли идрок этиш қобилиятини сусайтиришдан бошлаймиз.

Ўзини идора қила олмай қолган Рон беихтиёр ҳиринглаб юбориб, муштини оғзига тиқиб олишга мажбур бўлди.

- Аммо ораларингдан кимгадир омад кулиб боқиши, шу бугуннинг ўзида унга Кўриш насиб этиши ҳам мумкин.

Машғулот бошланди. Ўзини ниҳоятда тентакнамо ҳис этган Гарри ҳеч нарса ҳақида ўйламасликка уриниб, биллур шардан кўз узмай ўтирди. Шунга қарамай унинг миясидаги «қандай бемаънилик» деган фикр нари кетмади. Балки Рон ҳиринглаб, Гермиона тилини тақиллатиб ўтиргани учундир, хаёлини шарга жамлаб олиши янада қийин кечди.

- Бирон нима кўрдингиз-ми? - сўради Гарри шарга ўн беш дақиқа термилиб ўтирганидан сўнг.

- Ҳа. Кимдир столни куйдириб тешиб қўйибди, - деди Рон, тешикни кўрсатиб, - Шамни йиқитган бўлса керак.

- Вақтим бекор кетяпти, - арз қилди Гермиона, - Ундан кўра бирон-бир фойдали нарса, масалан Хахолатиш тилсими билан шуғуллансам бўлар экан...

Айни пайтда болаларнинг ёнидан профессор Трелани кўйлагини шитирлатиб ўтиб қолди.

- Шарнинг дудмол аломатларини талқин қилиш масаласида ҳеч кимга ёрдам керак эмасми? - хириллади у, зеб-зийнатларининг жаранг-журунгги орасида.

- Мен бундай ёрдамга муҳтож эмасман, - пичирлади Рон, - Шундоқ ҳам ҳаммаси тушунарли. Бугун кечқурун қалин туман тушар экан.

Гарри билан Гермиона хандон отиб юборишди. Ҳамма уларга юзланди. Парватти билан Лаванда эса синфдошларининг бундай қилиқларидан серрайиб қолишди.

- Бу нимаси! - ҳайрон бўлди профессор Трелани, - Ахир сиз бундай хулқингиз ила келажакдан келаётган хабарларнинг тебраниш жараёнини издан чиқаряпсиз!

Профессор болалар ўтирган столга яқин келиб, шарга тикилди. Гаррининг юраги шу заҳоти шув этиб кетди. Ҳозир у профессорнинг қандай фикр билдиришини олдиндан башорат қилиб бериши мумкин...

- Шар ниманидир кўрсатяпти! - пичирлади юзини шарга жуда яқин келтириб олган профессор Трелани, - Ичида нимадир қимирлаяпти... Нима экан у?

Жамики бисотим, шу жумладан, «Чақмоқ»имни ўртага қўйиб гаров ўйнашим мумкинки, ўйлади Гарри, шар ичида нима қимирлаётган бўлмасин, профессор учун яхшилик аломатини англатмайди.

- Қадрдоним... - хўрсинди ниҳоят профессор Трелани, болага бақрайиб, - Энди у Шар ичида янада аниқ кўриняпти. Сенга тобора яқин келаётган Сгу...

- Муқаддас фалак ҳақи! - бақириб юборди Гермиона, ўқитувчининг гапини бўлиб, - Яна ўша бемаъни Сгубит-ми!

Профессор Трелани йирик кўзларини шардан узиб, Гермионага қаратди. Парватти Лаванданинг қулоғига нимадир пичирлаб, иккала дугона Гермионага нафрат ила чақчайди. Вужудидаги қаҳр-ғазаб очиқдан-очиқ ёғилиб турган профессор Трелани қаддини ростлади.

- Дилсиёҳлик-ла тан олишим керакки, азизам, менинг дарсимга илк бор кириб келганингдаёқ инсон келажагини башорат қилишдек асл санъат учун талаб этиладиган Кўриш қобилиятидан батамом маҳрум эканлигингни дарҳол тушуниб етган эдим. Дарҳақиқат, тафаккури ўта моддий сендай ўқувчига ҳаётимда биринчи бор дуч келишим.

Орага бир дақиқали сукунат чўмди ва...

- Жуда яхши! - овоз кўтарди Гермиона.

У шартта ўрнидан турди-да, «Келажакни тўсиб турган туманни ҳайдаш» дарслигини юк халтасига куч билан тиқиб юборди.

- Жуда соз! - такрорлади қизалоқ, елкасига осаётган халта билан юмшоқ курсида ялпайиб ўтирган Ронни уриб йиқитишига бир бахя қолиб, - Ундай бўлса, бу фандан қўлимни ювганим бўлсин! Мен кетяпман, сиз қоляпсиз! Даргоҳингизни энди елкамнинг чуқури кўрсин!

Жамики синфни лол қолдирган Гермиона люк томон йўл олиб, қопқоғини тепиб очганча пастга тушиб кетди.

Синф тинчланишига бир неча дақиқа керак бўлди. Сгубитни эсига ҳам олмаган профессор Трелани Гарри билан Рон ўтирган столга орқа ўгириб, оғир ҳансираганча, ҳарир шолрўмолига зичроқ ўраниб олди.

- Ооооо! - кутилмаганда чинқириб юборди Лаванда ҳаммани сескантириб, - Профессор Трелани, бир вақтлар айтган гапингиз ёдимга тушди! Гермионанинг кетишини муқаддам кўргансиз, шундай эмасми?! «Пасха нишонланадиган кунларда орамизда ўтирганларнинг бири синфни бутунлай тарк этади», деган эдингиз! Эсингиздами, профессор Трелани? Сиз айнан шундай бўлишини аллақачон билган экансиз-да!

Профессор Трелани ёш олган кўзлари ила Лавандага миннатдор юзланиб, қизалоққа табассум ҳадя этди.

- Азизам, мисс Грэнжер бизни тарк этишини чиндан ҳам билган эдим. Шундай бўлса-да, доимо нохуш Аломатларни нотўғри талқин этганимизга умид қилиб қоламиз... Иқрор бўлиш керакки, башоратчининг табиатидаги Ички кўз – унинг оғир тақдиридир!...

Лаванда билан Парватти бир оз сурилиб, ёнларига келиб ўтирган профессорнинг ҳар бир сўзини юксак эҳтиром ила тинглаб ўтиришди.

- Гермионанинг бугунги куни жа ғалати ўтди-ми?! - ғудуллади Рон ишонқирамаган ҳайрат ила.

- Жуда...

Гарри биллур шарга қараб ўтириб, ичида айланаётган оқ тутундан бошқа нарсани илғай олмади. Наҳотки Сгубит профессор Треланига яна кўринган? Яна битта бахтсиз ҳодиса камлик қилиб турган эди! Квидиш бўйича финал ўйинидан олдин-а!

Ўқувчилар Пасха таътилида деярли ҳордиқ чиқаришмади. Ҳали уйга бу қадар кўп вазифа берилмаган. Ҳаддан ортиқ асабийлашиб кетган Невилль Лонгботтом қуёнчиқ касаллигига мубтало бўлиб қолишига оз қолди. Бундай ҳолатга тушиб қолган ёлғиз у эмас.

- Бу нима гап! Шу ҳам таътил бўлди-ми? - ўкириб юборди тоқати тоқ бўлган Симус Финниган, - Имтиҳонга ҳали етти қовун пишиғи бор! Улар бизни қай аҳволга солиб қўйишмоқчи ўзи?!

Лекин ҳеч ким Гермионачалик кўп ишлагани йўқ. Башорат фани айириб ташланганда ҳам қизалоқ ўз синфдошларининг ҳар қандай бирига нисбатан жуда кўп фанларни ўзлаштирди. Кечаси умумий меҳмонхонани охирги бўлиб тарк этса, эрталаб кутубхонага биринчи бўлиб етиб боради. Кўзларининг остини худди Люпиннинг доғлари каби доғ босиб, доимо жазавага яқин ҳолатда юрди.

Отбургут ишига оид шикоят аризасини расмийлаштириш ва гиппогриф ҳимоясини давом эттириш учун зарур бўладиган маълумотларни қидириб топиш масъулиятини Рон ўз зиммасига олди. Уйга берилган вазифалар ижроси орасидаги танаффуслар давомида у кўплаб китобларни, жумладан «Гиппогрифлар психологиясига оид, киссада олиб юриладиган маълумотнома мазмунидаги қўлланма», «Қушми ёки ҳайвон: гиппогрифларнинг шафқатсизлигига бағишланган илмий фикр-мулоҳазалар» каби рисолаларни ўқиб чиқди. Рон тегишли маълумотларни ўрганиб чиқиш ишига шу қадар берилиб кетдики, баъзан ёнига келган Маймоқоёқни қувиб солишни унутиб қўйди.

Гарри эса уйга берилган вазифалар ижросига квидиш машқлари ва бўлажак ўйин тактикасига оид Древ билан ўтадиган чексиз муҳокамалар орасидагина вақт топа олди. «Гриффиндор» билан «Слизерин» ўртасидаги ўйин Пасха таътилидан сўнги биринчи ҳафтанинг шанба куни ўтиши керак. Бугунги кунга келиб «Слизерин» квидиш жамоаси роппа-роса икки юз очко билан турнирда пешқадамлик қилмоқда. Бу эса гриффиндорчилар кубокни қўлга кирита олишлари учун шанба кунги ўйинда икки юздан ортиқ очко билан ғолиб чиқишлари кераклигини англатади. Древ бу ҳақда жамоа аъзоларига эслатавериб, жағи оғримади. Шунингдек, ишнинг бундай тарзда юзага келган ҳолати ғалаба қозониш масаласидаги жавобгарлик масъулияти деярли тўла-тўкис Гаррининг зиммасига юкланишини ҳам англатади. Маълумки, Тилла чаққонни тутиб олган Сайёд ўйинни, ўз жамоасига қўшимча юз эллик очко келтирган тарзда якун топтиради.

- Ёдингдан чиқмасин, биз рақибга нисбатан элликдан ортиқ очкога эга бўлганимиздан сўнггина Тилла чаққон овига киришасан, - такрор ва такрор таъкидлади Древ, - Фақат элликдан ортиқ очкога эришганимиздан сўнг, Гарри, шуни унутмагин, хўпми?. Акс ҳолда, ўйинни ютганимиз билан кубокни қўлга кирита олмаймиз. Гапимни уқдинг-ми, Гарри? Демак, Тилла чаққонни фақат биз...

- ТУШУНДИМ, ОЛИВЕР! - ахири бақириб юборди Гарри.

Сўнгги кунларда «Гриффиндор» коллежининг барча ўқувчилари фақат кубок учун кураш ҳақида гапирадиган бўлиб қолди. Ахир коллеж Роннинг иккинчи акаси бўлмиш машҳур Чарли Уэсли замонидан буён квидиш кубогини қўлга кирита олгани йўқ. Лекин бари-бир ғолиб чиқишни ҳеч ким Гарричалик истамайди.

Малфой иккаласининг ўртасидаги адоват роса авжига чиқди. Хогсмёдда балчиқбўрон қилиниб камситилганлиги-ю, Гаррининг жазодан қутулиб қолганлиги Малфойни алам ўтида ёндираётган бўлса, Гарри ўз навбатида, «Равенкло» жамоаси билан ўтган ўйинда Малфойнинг ўз ҳамтовоқлари билан уни ўйиндан чиқаришга уринганини ҳеч унута олмаяпти. Отбургут билан боғлиқ ишлар эса жамики мактабнинг кўз ўнгида Малфой билан орани очиқ қилиш истагига янада кескин тус бермоқда.

Ўйин олдидаги вазият ҳали бу қадар жиддий, таҳликали даражада юзага келмаган. Таътил ниҳоясига келиб жамоалар ўртасида ҳам, умуман икки коллеж ўқувчилари орасида ҳам қарор топган муносабатлар портлаш хавфига бориб етди. Қаср йўлакларида тез-тез содир бўладиган майда жанжаллар одатий ҳолга айланиб қолди. «Гриффиндор»нинг тўртинчи синф ўқувчиси билан «Слизерин»нинг олтинчи синф ўқувчиси қулоқларидан порей (Порей – пиёзнинг япалоқ баргли тури) пиёзининг кўм-кўк барги ўсиб чиққан ҳолатда шифохонага ётқизилиши мулоҳаза юритилаётган муносабатларнинг ўта кескинлашиб кетган даражаси бўлди.

Бу давр Гарри учун жуда оғир кечди. Синф хонасидан бирор-бир слизеринчи чалиб юбормай чиққан кун бўлмади. Худди ердан чиққан қўзиқориндай пайдо бўладиган Краббе билан Гойл Гаррини ҳамма жойда изма-из таъқиб қилиб, унинг ёлғиз эмаслигини кўргач, умидсиз башара ясаганча нари узоқлашиб кетишади. Слизеринчилар пайт пойлаб, жамоа Сайёдини сафдан чиқариб қўйишлари мумкинлигини сезган «Гриффиндор» сардори Древ, бундай ҳолатнинг олдини олиш мақсадида Гаррини ҳамроҳларсиз, ёлғиз ўзини қаерга бўлмасин чиқармасликни буюрди. Жамики коллеж ушбу буйруқ ижросига зўр ғайрат ила киришиб кетди. Натижада шошилмай, жонли суҳбат қуриб борадиган кўп сонли халойиқ орасида ниҳоятда секин одимлаб юришга мажбур бўлиб қолган Гарри дарсга бир неча бор кеч қолди. Боланинг ўзи эса кўпроқ супургисидан хавотир олди. У квидиш машқлари орасидаги танаффусларда «Чақмоқ»ни сандиғига қулфлаб сақлайдиган, дарслар ўртасидаги танаффусларда эса супургиси жойида турганлигига ишонч ҳосил қилиш учун ётоқхонага тез-тез югуриб бориб, хабар оладиган бўлиб қолди.

Ўйин арафасидаги оқшомда «Гриффиндор» минорасидаги одатий фаолият тубдан ўзгарди. Ҳатто Гермиона ҳам дарсликларини четга суриб қўйди.

- Хаёлимни жамлай олмаяпман, - арз қилди у.

Минорани шовқин қамраб олган. Асабийлашган Фред билан Жоржнинг хулқ-атвори янада шиддатли тус олди. Оливер бурчакда, квидиш ўйингоҳининг макети ёнида ўтириб, ўйинчиларнинг митти қоматларини сурганча, алланималарни ғудуллаяпти. Ангелина, Алисия ва Кэтти эгизакларнинг ҳазилларидан худди жазавалари тутиб қолгандай хандон отишмоқда. Гарри бир четда, Рон билан Гермионанинг ёнида ўтириб, эртанги кун ҳақида ўйламасликка ҳаракат қилмоқда. Акс ҳолда худди ичида аллақандай баҳайбат нарса бор-у, ташқарига отилиб чиқишга уринаётганини ҳис этмоқда.

Гарчи ўзи ҳам ташвиш тортаётгани билинаётган бўлса-да, Гермиона Гаррини тинчлантиришга уринди.

- Ҳаммаси яхши бўлади.

- Сенда «Чақмоқ» бор экан, хавотирга ўрин йўқ! - ишонч бағишлаган бўлди Рон.

- Ҳа... - жавоб қайтарди, ичи ташқарига шимарилиб кетгудай бўлиб ўтирган Гарри.

Древнинг кутилмаганда янграган командасини Гарри қандайдир енгиллик билан қабул қилди:

- Жамоа! Уйқуга!

Унинг уйқуси жуда оғир кечди. Дастлаб тушига ухлаб қолиб, ўйинга кеч қолгани-ю, Древ унга: «Қаерда юрибсан? Ўрнингга Невилль ўйнашига тўғри келди!», деб қичқираётгани кирди. Шундан сўнг, Малфой ва «Слизерин» жамоасининг қолган аъзолари ўйинга супурги эмас, аждар эгарлаб келишгани кирди. Гарри Малфой эгарлаган аждарнинг оғзидан чиқаётган оловга базўр чап бериб, катта тезликда учаётган эмиш. У кутилмаганда «Чақмоқ»ни унутиб қолдирганини англаб, ерга қулай кетибди. Ахири бола сесканиб уйғонди.

Ҳали ўйин бўлиб ўтмагани, ҳалигача ўз кўрпасида ётгани, «Слизерин» жамоасига аждар эгарлашга рухсат берилиши амри маҳол эканлигини идрок этиш учун Гаррига бир неча сония керак бўлди. Ўлгудай чанқаганини ҳис этиб, астагина каравотидан тушди-да, дераза ёнидаги, устида сув қуйилган кўза турган столча ёнига борди.

Мактаб ҳовлиси сокин. Енгил бўлса ҳам шабада эсаётгани йўқ. Ман этилган ўрмон дарахтларининг учи қилт этмайди. Новдаларини пастга тушириб олган Уришқоқ тол худди беозордай кўринади. Ҳа, бундай шароитда ўйнаса бўлади.

Гарри кўзани жойига қўйиб, энди кўрпасига қайтмоқчи бўлган эди ҳам-ки, кўзи ҳовлидаги аллақандай ҳаракатни илғаб қолди. Кумуш тусли майсазорда қандайдир ҳайвон ўғринча юрибди.

Гарри каравоти олдида турган жавон олдига югуриб бориб, унинг устидаги кўзойнагини олиб тақди-да, боз ҳовлига қаради. Фақат Сгубит бўлмасин. Ҳозир эмас, ўйин олдида эмас...

У ҳовлини кўздан кечириб, бир дақиқали кузатувидан сўнг, Ман этилган ўрмон четига яқинлашиб қолган ҳайвонга кўзи тушди... Э хайрият Сгубит эмас... мушук экан... Пахмоқ думни таниб енгил тортган Гарри дераза токчасига суянди. Маймоқоёқ-ку...

Маймоқоёқнинг ёлғиз ўзи-ми ёки?... Гарри бурнини дераза ойнасига маҳкам босиб, кўзини қисиб олди. Маймоқоёқ кескин тўхтади. Қоп-қора ўрмон тусида мушук ёнида яна нимадир ҳаракатланаётган кўринади. Тўппа-тўғри, Гарри бунга шубҳа қилмай қўйди.

Мана у – ниҳоятда баҳайбат, жуни пахмоқ, қоп-қора ит. У майса устида ўғринча ҳаракатланяпти, Маймоқоёқ эса унга базўр етишиб юрибди. Ҳеч нарсани тушуна олмаган Гарри иккала ҳайвонга тикилиб қолди. Бу қанақаси бўлди? Маймоқоёқ ҳам итни кўра олар экан, қанақасига бу кўппак Гаррининг ажалини англатадиган сирли аломат, черков саройларида кўриниш берадиган ит арвоҳи бўлиши мумкин?

- Рон! - пичирлади Гарри, - Уйғонсанг-чи, Рон!

- Ў?

- Ҳозир кўзингга ҳовлида бирор нима кўринаётган-кўринмаётгани қизиқтиради мени...

- Ҳали қоронғи-ку, Гарри, - уйқусираб минғирлади Рон, - Нималар деяпсан?

- Туриб қарасанг-чи!...

Гарри яна деразадан ташқарига қаради.

Энди Маймоқоёқ ҳам, ит ҳам йўқ. Гарри токчага чиқиб, зулмат қаърига, қаср деворларининг остига тикилди. Ҳайвонлар қаёққадир гум бўлибди. Қаёққа?

Баланд пишиллаган товуш эшитилди. Рон яна ухлаб қолиб, еттинчи тушини кўриб ётибди.

Тонг отди. Гарри ўз жамоаси билан бирга гулдурос қарсаклар остида Катта Залга кириб келди. Қарсаклар нафақат «Гриффиндор», балки «Хуффльпуфф» ва «Равенкло» столларидан ҳам янграётганини англаган Гаррининг оғзи қулоғига етди. Малфойнинг рангпар юзи одатдагидан баттар оқариб кетган.

Нонушта давомида Древ, гарчи ўзи туз ҳам тотмаган бўлса ҳам, жамоа аъзоларини овқатланишга мажбур қилиб ўтирди. Ҳали жамики мактаб нонушта қилиб ўтирган пайтда жамоа сардори болаларни ўйин майдонига, ҳамма ёқни қараб, кўздан кечириб чиқишлари учун олиб чиқишга аҳд қилди. «Гриффиндор» жамоаси Катта Зални қарсаклар остида тарк этди.

- Омад ёр бўлсин, Гарри! - эшитилди Чунинг овози.

Гарри қизариб кетаётганини ҳис этди.

- Хўш! - вазиятни таҳлил қилди Древ, - Шамол йўқ... Қуёш ҳаддан ортиқ чарақлаб турибди. Демак кўриниш масаласида муаммолар бўлиши мумкин, шуни назарда тутинг... Ер етарлича қаттиқ, бу яхши, ҳавога тез кўтариламиз...

Древ ўз ўйинчилари ҳамроҳлигида ўйин майдонининг у ёғидан бу ёғига юриб чиқиб, ҳамма ёқни батафсил кўздан кечириб чиқди. Ниҳоят узоқдан қаср эшиги очилиб, ўқувчилар оқими чиқиб келаётгани кўринди.

- Уствошхонага! - қисқа қилди Древ.

Жамоа аъзолари қизил коржомаларини кийишар экан, чурқ этишмади. Ҳамма ҳам ўзини нонуштага қандайдир ўйноқи нарса егандай ҳис этаётган-этмаётгани айни пайтда Гаррини қизиқтирган масала бўлди. Ҳали бир сония ҳам ўтиб улгурмагандай бўлди-ю, Древнинг командаси янгради:

- Яхши, вақт бўлди, чиқамиз...

Жамоа майдонга чиқиши билан намойишгоҳлар айюҳаннослардан портлаб кетди. Томошабинларнинг тўртдан уч қисми коржомаларига тўқ қизил тўгаракча тақиб олган бўлиб, қўлларидаги «Гриффиндор» шери тасвирланган тўқ қизил байроқлар ва БИЗ СЕН БИЛАН «ГРИФФИНДОР», КУБОК ШЕРЛАРГАГИНА ЯРАШАДИ! каби ёзувлар битилган плакатларни силтамоқда. Бироқ «Слизерин» ҳалқалари ортида ҳам эгнига яшил кийим кийган икки юз кишидан ортиқ томошабин ўтирибди. Уларнинг байроқларида «Слизерин»нинг кумуш тусли илони ярқирамоқда. Олдинги қаторнинг марказида, одатда, қора кийиниб юрадиган профессор Снегг бугун яшил коржома кийганча, тарвайиб ўтирибди. Унинг юзига мурдор табассум ёпишиб қолгандай кўринди.

- Майдонга гриффиндорчилар чиқишди! - ўкирди Ли Жордан, одатдагидай, ўйин шарҳловчиси сифатида, - Поттер, Бэлл, Жонсон, Спиннет, Уэсли, Уэсли ва ниҳоят, жамоа сардори Древ. Сўнгги бир неча йил давомида ушбу жамоа «Хогварц»нинг энг яхши жамоаси, деган номга сазовор бўлиб келмоқда...

Жорданнинг шарҳи слизеринчи мухлислар ўтирган томондан эшитилган ўкириклар остида қолиб кетди:

 - Буууу!

- Мана жамоа сардори Флинт бошчилигидаги слизеринчилар ҳам кўриниш берди! Сардор ўз жамоасининг сафини ўзгартирган кўринади. Энди жамоа ўйинчилари маҳоратига кўра эмас, бўйига тўғри келган тарзда саф тортибди...

Яна слизеринчилар томонидан ўкириклар эшитилди:

 - Буууу!

Ли ҳақ, ўйлади Гарри. Негаки Малфой жамоанинг энг пакана ўйинчиси экан. Қолганларининг бўйи эса сарой гренадёрларининг (Гренадёр – бўйдор кишилардан саралаб тузилган полкнинг ҳарбий хизматчиси) бўйидай келади.

- Сардорлар, қўл сиқишинглар! - деди Роланда Трюк хоним.

Флинт билан Древ бир-бирига яқин келиб, қўл сиқишди. Бироқ ушбу манзара худди икки киши бир-бирининг бармоқларини синдириш мақсадида учрашгандай кўринди.

- Супургилар эгарлансин! - команда берди Трюк хоним, - Уч... икки... бир...

Ҳуштак товушини халойиқнинг қичқириғи босиб юборди. Ҳавога ўн тўртта супурги бирдай кўтарилди. Юқорида эсаётган шамол Гаррининг пешонасига тушган сочини орқага ташлади. Парвоз лаззати боланинг вужудидаги ҳаяжон ҳиссини батамом қувиб солди. Атрофга қараб, орқасига ўтиб олган Малфойни кўрган Гарри Тилла чаққонни қидириб хотиржамгина уча бошлади.

- Тўп «Гриффиндор»да, Алисия Спиннет Кваффлни тўппа-тўғри слизеринчилар ҳалқалари томон олиб кетмоқда. Зўр ишлайди-да, шу Алисия деганлари! О, йўқ! Кўзим тегди шекилли, Кваффлни «Слизерин» жамоасининг Овчиси Уоррингтон олиб қўйди. Уоррингтон майдон узра учмоқда. ТАРС! Тажовузкор билан қандай муомала қилиш кераклигини Жорж Уэсли зўр маҳорат ила кўрсатиб қўйди. Насибасини еган Уоррингтон Кваффлни қўлидан чиқариб юборди... Энди тўпни... Жонсон тутиб олди. «Гриффиндор» боз тўпга эгалик қилмоқда. Бўш келма, Ангелина! У Монтегюни ниҳоятда чиройли айланиб ўтди. Ангелина, бошингни ҳам қил, Тажовузкор келяпти! ГОЛ! «ГРИФФИНДОР» ҲИСОБНИ ОЧДИ, ЎН-У, НОЛЬ! БАРАКАЛЛА АНГЕЛИНА!

Майдон четида учиб юрган Ангелинанинг остидаги тўқ қизил уммон қизалоққа таҳсин ўқиди.

- ВОЙ!

Маркус Флинт келиб уриб юборган Ангелина супургисидан қулаб тушишига бир бахя қолди.

- Маъзур сананг! - қичқирди Флинт пастдан янграган эътирозларга жавобан, - Мен уни сезмай қолибман!

Сония ўтар-ўтмас Жорж Уэсли етиб келиб, қўлидаги клюшка билан Флинтнинг бошига солди. Флинт бурни билан ўз супургисининг сопига урилиб, башараси қонади.

- Қани, бас қилинг-чи! - чириллаб юборди Роланда Трюк хоним, иккаласининг ўртасига келиб, - «Гриффиндор» жамоасига, унинг Овчисига нисбатан қасддан қилинмаган ҳамла учун эркин тўп ва «Слизерин» жамоасига, унинг Овчисига нисбатан қасддан қилинган ҳамла учун эркин тўп тайинлади!

- Қўйсангиз-чи, мисс! - бақириб юборди Фред.

Бироқ Роланда Трюк хоним ҳуштагини чалди. Алисия жарима тўпини улоқтириш учун олға ташланди.

- Маҳоратингни кўрсат, Алисия! - қичқирди Ли ўйингоҳ узра қарор топган сукунатни бузиб, - ҲА! ГОЛ! АЛИСИЯ ГОЛ УРДИ! ЙИГИРМА-Ю, НОЛЬ, «ГРИФФИНДОР» ФОЙДАСИГА!

Гарри Флинт томон юзланиш учун «Чақмоқ»ни кескин буриб олди. Флинт жарима тўпини улоқтириш учун ҳалқалар томон яқинлашиб келмоқда. Унинг бурнидан қон оқиши ҳали тўхтагани йўқ. Жағини маҳкам қисиб олган Древ «Гриффиндор» ҳалқаларининг олдида муаллақ осилиб турибди. Флинт эса Трюк хонимнинг ҳуштагини кутмоқда.

- Древнинг моҳир Қўриқчи эканлигига шубҳа қилмасангиз ҳам бўлаверади! - маълум қилди Ли Жордан томошабинларга, - Жуда моҳир! Уни енгиш ниҳоятда қийин! МАНА! МЕН НИМА ДЕДИМ! АЖОЙИБ! У ТЎПНИ ТУТИБ ОЛДИ!

Кўнгли тинчиган Гарри Лининг сўзларига диққат билан қулоқ солганча, Тилла чаққонни қидира кетди. Токи «Гриффиндор» рақибга нисбатан элликдан ортиқ очкога эга бўлмас экан, Малфойни Тилла чаққонга яқин келтирмаслик жуда муҳим аҳамият касб этади...

- Тўп «Гриффиндор»да, йўқ, энди «Слизерин»да, йўқ, тўп ҳар қалай «Гриффиндор»да ва бу Кэтти Бэлл. У майдонни кесиб ўтмоқда. МАНА БУ ҚИЛИҚ ЭСА ҚАСДДАН ҚИЛИНГАН ДЕЙИЛАДИ!

Слизеринчиларнинг овчиси Монтегю Кэттининг қаршисига чиқиб, тўп ўрнига қизалоқнинг бошини чангаллаб тортди. Кэтти ҳавода айланиб кетган бўлса-да, супургисини маҳкам ушлаб қолди. Бироқ Кваффл қўлидан чиқиб кетди.

Роланда Трюк хонимнинг ҳуштаги боз янгради. У Монтегюнинг ёнига учиб келиб бақира кетди. Бир дақиқадан сўнг Кэтти яна битта жарима голини урди.

- ЎТТИЗ-У, НОЛЬ! МАНА СЕНГА ДИЁНАТСИЗ, НОПОК...

- Жордан, агар муносабатсиз шарҳлай олмас экансиз...

- Мен ҳар нарсани ўзи номи билан атаб шарҳламоқдаман, профессор!

Гаррининг қалбини завқ-шавқ тўлқини қамраб олди. У «Гриффиндор» ҳалқаларидан бир неча фут нарида ялтираётган Тилла чаққонни кўриб қолди. Бироқ ҳозир уни тутиш мумкин эмас. Агар Малфой кўриб қолса-чи...

У хаёли нимагадир жамланганини акс эттирди-да, супургисини айлантириб, майдоннинг слизеринчилар томонига қараб учди. Найранг кор берди. Малфой Гаррининг Тилла чаққонни кўриб қолганига ишониб, орқасидан қува кетди...

ВИЗЗЗ!

Гаррининг ўнг қулоғи ёнидан «Слизерин» жамоасининг Уриб қайтарувчиси Деррик томонидан йўлланган Тажовузкор учиб ўтди. Хаёл ўтмай яна...

ВИЗЗЗ!

Бу сафар Уриб қайтарувчи Боул томонидан йўлланган Тажовузкор Гаррининг тирсагига тегиб ўтди.

Гарри кўзининг қири ила қўлларидаги клюшкаларини қулочкашлаб, рақиб Сайёдига зарб беришни ният қилган Боул билан Деррик икки томондан ташланганини кўриб қолди. Бола пайт пойлаб турди-да…

Энг сўнгги фурсатда Гарри «Чақмоқ»ни юқорига кескин йўллади. Боул билан Деррик бир-бирига зарб берганча, қаттиқ тўқнашиб кетишди.

- Ҳа-ҳаҳаҳа! - кулиб лаззатланди Ли Жордан, иккала Уриб қайтарувчи бошларини ушлаганча бир-биридан узоқлашганини кўриб, - Бўлмади, а, болакайлар! «Чақмоқ»ни енгиш учун эртароқ уйғониш керак! Тўп яна «Гриффиндор»да, Кваффлга Жонсон эгалик қилмоқда. Флинт унинг ортида. Кўзига бармоғингни тиқиб ол, Ангелина! Ҳазиллашдим, профессор, шунчаки ҳазиллашдим. О, йўқ! Флинт тўпни қўлга киритиб, «Гриффиндор» ҳалқалари томон ошиқмоқда. Бўш келма, Древ, қутқар!

Бироқ Флинт гол уришга муваффақ бўлди. Ўйингоҳнинг слизеринчилар томонида қийқириқлар янгради, Ли эса шу қадар чангитиб сўкинди-ки, профессор Макгонагалл шарҳловчининг қўлидан сеҳрли мегафонни тортиб олишга киришди.

- Узр, профессор, узр! Қайта такрорланмайди! Шундай қилиб, «Гриффиндор» ўттиз-у, ўн ҳисоб билан пешқадамлик қилмоқда...

Гарри ҳали бундай нопок ўйинда иштирок этмаган. «Гриффиндор» бу қадар тез олдинга чиқиб олганидан дарғазаб бўлган слизеринчилар Кваффлни қўлга киритиш учун ҳар қандай қилиқдан ҳазар қилмай қўйишди. Боул клюшкаси билан Алисияни уриб юборгач, гўё Тажовузкор билан адаштириб юборганини тушунтирди. Жорж Уэсли эса бунга жавобан Боулнинг юзига тирсак солди. Роланда Трюк хоним иккала жамоага ҳам жарима тўпини тайинлади. Древ яна бир бор зўр маҳорат кўрсатиб, жамоа ҳалқаларни ҳимоя қила олди. Ҳисоб «Гриффиндор» фойдасига: қирқ-у, ўнга етди.

Тилла чаққон кўзга кўринмади. Ўйин узра парвоз қилиб, жамоасининг рақибга нисбатан элликдан ортиқ очкога эга бўлишини кутганча, коптокчани қидириб юрган Гаррининг ортидан эргашиб учаётган Малфойнинг кўзлари бежо бўлиб қолган...

Кэтти гол урди. Эллик-у, ўн. Слизеринчилар қасд олишларига йўл қўймаслик учун Фред билан Жорж клюшкаларини кўтариб олганча Кэттининг атрофида учиб юришди. Эгизакларнинг йўқлигидан фойдаланиб қолишган Боул билан Деррик иккала Тажовузкорни Древга йўллашди. Тўплар бирин-кетин бечора Древнинг қорнига бориб урилди. Оғзи билан базўр нафас олган Древ супургисини маҳкам ушлаб, ҳавода пир айланиб кетди.

Роланда Трюк хонимнинг ғазаби қайнади.

- КВАФФЛ ҲУЖУМ ЗОНАСИДАН ТАШҚАРИДА ЭКАН, ҚЎРИҚЧИГА ҲАМЛА ҚИЛИШ МУМКИН ЭМАС! - асабийлашиб қичқирди у Боул билан Деррикка, - «Гриффиндор» жамоасига, унинг Қўриқчисига нисбатан ғайриқонуний амалга оширилган ҳамла учун эркин тўп тайинланади!

Ангелина яна битта гол урди. Ҳисоб олтмиш-у, ўн. Фурсат ўтмай Фред Уэсли Тажовузкор билан Уоррингтонга зарб бериб, унинг қўлидаги Кваффлни уриб чиқарди. Алисия тўпни эпчиллик билан илиб олди-да, слизеринчилар ҳалқаси томон ошиқиб, яна битта гол урди. Ҳисоб етмиш-у, ўнга бориб етди.

«Гриффиндор» жамоасининг мухлислари бақиравериб хириллаб қолишди. «Гриффиндор» жамоаси рақибга нисбатан элликдан ортиқ очкога эга бўлди. Агар ҳозир Гарри Тилла чаққонни тутиб олса, кубокни тутиб олган бўлади! Майдон узра жуда баланд учиб юрган Гарри юзлаб нигоҳлар энди унга қаратилганлигини жисмонан ҳис этиб турибди. Малфой эса уни изма-из таъқиб қилиб келяпти.

Мана ниҳоят бош узра йигирма футча юқорида ялт этган Тилла чаққон кўринди.

Гарри тезликни оширди. Юқорида эсаётган шамол қулоққа янада қаттиқ урилди. У қўлини коптокчага узатган эди ҳам-ки, кутилмаганда «Чақмоқ» ҳаракатининг тезлиги кескин пасайди...

Нима бўлаётганини тушунмай, вужудини ваҳима қамраб олган Гарри атрофга қаради. Танасини олдинга узатиб олган Малфой «Чақмоқ»нинг говронларини маҳкам ушлаб, орқага тортаётган экан.

- Ҳой, сен!...

Гаррининг ғазаби шу қадар қайнаб кетди-ки, Малфойнинг башарасига бажонидил қўйиб юборар эди-ю, қўли етмайди. Малфой, «Чақмоқ»ни қўлда тутиб қолишга уриниб, кучанганидан пишқириб қолган бўлса-да, ёвуз кўзлари қувончдан ялтирамоқда. У ўз мақсадига эришди. Тилла чаққон кўздан ғойиб бўлди.

- Эркин тўп! «Слизерин» ҳалқаларига қарата эркин тўп! Бу қанақанги ўйин тактикаси бўлди! - чириллади Роланда Трюк хоним «Чақмоқ»нинг думини эндигина қўйиб юборган Малфойнинг ёнига учиб келиб.

- АХ СЕН! ХАРИШ ФИРИБГАР! - қичқирди Ли Жордан, профессор Макгонагаллдан ўзини нари олиб, - АХ СЕН ЯРАМАС, ИФЛОС К...

Бошидаги шляпаси учиб тушган профессор Макгонагалл Ли Жорданга панд-насиҳат ўқимади. У ҳам эл қатори эътирозли қичқириб, бармоғи билан Малфойга таҳдид қилди.

Алисия жарима тўпини улоқтирди-ю, бироқ дарғазаблигидан бир неча футга адашди. «Гриффиндор» жамоаси ўзини идора қила олмай қолди, слизеринчилар эса Малфойнинг найрангидан қувониб, юқорига кўтарилиб кетди.

- Тўп «Слизерин»да. Слизеринчилар ҳалқалар томон ошиқмоқда. Монтегю гол урди... - инграб юборди Ли Жордан, - Ҳисоб етмиш-у, йигирма, «Гриффиндор» олдинда.

Гарри Малфойга шу қадар яқин учиб бормоқда-ки, баъзан иккаласининг тиззаси урилиб кетяпти. Гарри Малфойни Тилла чаққонга яқин келтирмоқчи эмас...

- Нари тур, Поттер! - ноилож қичқириб юборди Малфой, унинг бурилишига Гарри тўсқинлик қилганида.

- Кваффл Ангелина Жонсонда, бўш келма, гўзал қиз, бўш келма!

Гарри атрофга эътибор қаратди. Малфойни ҳисобга олмаганда «Слизерин» жамоасининг жамики ўйинчилари, ҳатто Қўриқчиси ҳам Ангелина томон ёпирилиб келмоқда. Уларнинг мақсади аён – қизнинг хатти-ҳаракатларини барбод қилиш...

Гарри «Чақмоқ»ни бир юз саксон градусга бурди-да, сопига шу қадар энгашиб олди-ки, деярли узала тушиб ётиб олди ва супургини ниқтаб, ўзини худди снаряд каби слизеринчилар тўдасига урди.

- АААААААА!

Слизеринчилар кўзлаган ният пучга чиқди. Энди Ангелинанинг йўли очиқ.

- ГОЛ! У ҲАЛҚАЛАРНИ ИШҒОЛ ЭТДИ! ГОЛ! Ҳисоб саксон-у, йигирма. «Гриффиндор» янада пешқадамлик қилмоқда.

Намойишгоҳларга боши билан урилиб кетишига бир бахя қолган Гарри кескин тўхтаб, ортга бурилди-да, майдон маркази томон учиб кетди.

Ана шунда у, юрагини деярли тўхтатиб қўйган манзарани кўриб қолди. Башараси музаффарият қиёфасини касб этган Малфой пастга қараб шўнғиб кетмоқда. Ундан бир неча фут пастда, ям-яшил майса узра қанотчаларини пирпиратаётиб учиб юрган миттигина Тилла...

Гарри «Чақмоқ»ни ерга жадал йўналтирди. Афсуски Малфой ҳаддан ортиқ узоқда...

- Тезроқ! Тезроқ! Тезроқ! - қистади Гарри супургисини.

У Малфойни қувиб етмоқда. Боул Гаррига қарата Тажовузкорлардан бирини йўллади. Бола бошини сопга ёпиштириб, тўпга чап беришга мажбур бўлди. Мана у Малфойнинг тўпиғига етиб олди. Ана энди иккаласи теппа-тенг пастлашмоқда...

Гарри сопни қўйиб юборганча иккала қўлини олдинга кескин узатди-да, Малфойнинг қўлини итариб юборди ва...

- ҲААААААА!

Гарри қўлларини баланд кўтариб олганча, кескин тепага кўтарилди. Сув қуйгандай жимжит бўлиб қолган ўйингоҳ гулдурос олқишлардан портлаб кетди. Гарри халойиқ узра учиб айланди. Қулоғи қандайдир ғалати шанғиллаб қолган. Кичкинагина тилла коптокча қанотчаларини пирпиратганча муштида итоат қилиб ўтирибди.

Кўз ёшлари оқиб, деярли ҳеч нарсани кўрмай қолган Древ учиб келди-да, Гаррининг елкасига бошини қўйиб, ўзини тўхтата олмай ҳўнграб юборди. Хаёл ўтмай белига иккита зарба еди. Фред билан Жорж шу тариқа ўзларининг тасанносини изҳор этишди. Ангелина, Алисия ва Кэттининг:

- Кубок бизники! Кубок бизники! - деб чийиллашлари Гаррининг қулоғини битказиб қўйишига сал қолди.

Осмон-у фалакда бир-бирини маҳкам ушлаб олган «Гриффиндор» жамоаси айюҳаннос солганча, айланма ҳаракат бажариб, ерга қўнди.

Тўқ қизил мухлислар тўлқини кетидан янги тўлқини тўсиқлардан ошиб, майдонга оқиб кела бошлади. Ўйинчиларнинг белларига таҳсин билдирилаётган турткилар жаласи ёғилди. Қий-чув солаётган таналар Гаррининг кўз ўнгида ягона гирдобга айланиб кетди. Шундан сўнг халойиқ уни, жамоанинг бошқа аъзолари билан бирга елкасига кўтариб олди. Юқорига кўтарилгач, энига бошдан оёқ тўқ қизил тўгарак ёпиштириб қўйилган Хагридни кўрди.

- Сен уларни қилганингча, қилдинг, Гарри! Сен ғолиб чиқдинг! Отбургут билса борми!

Ўз улуғворлигини унутиб қўйган Перси эса васвасага тушиб қолгандай турган жойида сакрашини қўймайди. «Гриффиндор» байроғига кўз ёшларини артаётган профессор Макгонагалл Древдан баттар ҳўнграмоқда. Гаррига яқинлашишга уринаётган Рон билан Гермиона тирсакларини ваҳшиёна ишга солишган. Улар айтгани сўз топа олишмаяпти. Иккаласи бахтиёр яшнаганча, минбарда, қўлига улкан квидиш кубогини ушлаб турган Дамблдор томон олиб кетилаётган Гаррига қараб қолишди.

Мана энди пайдо бўлсин-чи, бирорта дементор... Ўзини йиғидан тўхтата олмаётган Древнинг қўлидан кубокни олиб, боши узра баланд кўтарар экан, Гарри, айни пайтда, энг зўр, энг ишончли, энг қудратли Ҳимоячини ярата олишини ҳис этди.