Бир уйдан бошқасига кўчиб ўтганимизда мебелни ташиш билан боғлиқ қийинчиликлар ҳалигача эсимда. Айниқса, бесўнақай диванни айтмайсизми. Уйда турганида унда юмшоққина ўтириш маза экану юк машинасидан тушириб, тўртинчи қаватгача кўтариб чиқишнинг «мазаси» ўзгача экан. Бир неча кун ёшлигимда эмган она сутим таъмини ҳис қилиб юрганман. Аммо замонлар ўзгариб, баъзи мебель корхоналари ташиш муаммосини ҳам анча енгиллаштиришга интилаётган кўринади. Зеро, қуйида шундай диван ҳақида сўз боради.

Oi модулли диванлари тузилиши билан ажралиб туради. Ташиш масаласи кўтарилганида у йиғиб қўйилса, оддий диванлардан уч баравар кам жой эгаллайди. Аслини олганда бундай диванни бир жойдан бошқа жойга элтиш учун бир кишининг ўзи кифоя (!).

Шунинг ўзи маҳсулотга алоҳида эътибор қаратишга ундайди. Бироқ Oi диванлари ишлаб чиқарувчиси уни янада антиқа қутига жойлашга аҳд қилибди. Идиш ичидаги маҳсулотнинг ғайриоддийлигини янада бўрттириши керак. Cocoon Branding халқаро агентлиги олдида оддий ва шу билан бирга харидорга антиқа мебель сотиб олаётганини яққол намойиш этадиган қути дизайнини ишлаб чиқиш масаласи турарди. Агентлик бунинг уддасидан чиқа олди. Дизайнерлар диван қутисини кулгили ёзувлар билан бойитишди. Мисол учун, «Тезроқ ёруғ оламни кўрсатсанг-чи, қоронғуда қисилиб кетдим-ку!» сингари. Бундан ташқари, баъзи қутиларга латифалар ҳам ёзиб чиқишди. Натижада диванни ёйиб, унга ўтирган эмас, балки шунчаки диванни кўрган одамнинг ҳам кайфияти кўтарилиши шубҳасиз.