Ишдан итдек чарчаб уйга келиб, овқат-повқат ва бошқа процедураларни қилиб бўлгач, маза қилиб ухлашни истайсиз. Шундоқ ётсангизу ҳеч ким тегмаса-да мириқиб хурракни отсангиз. Бироқ «Келинлар қўзғолони» фильмидаги «исёнкорлар раҳбари» – кенжа келин Нигоранинг сўзлари билан айтганда, «Чучварани хом санабсиз». Тинчгина уйқуни етти ухлаб тушингизда ҳам кўрмайсиз (сўз ўйинини қаранг). Бунга ҳар доим ҳам ёнингиздаги хотинингиз айбдор эмас. Ахир «винғ»иллайверадиган жонивор аёлингиз эмас, нақд қонингизни сўриб оладиган чивин-ку. Ана ундан қутулиш ҳақида бир бош қотирсангиз бўларди. Мисол учун ҳиндистонлик Метьюс Кей сингари.
45 ёшли киши қуёш энергияси ёрдамида ишлайдиган "Метьюс" чивин қопқонини яратди. Унинг бошқа шундай мосламалардан фарқи – одам ва атроф-муҳит учун хавфсизлигида.
Мослама чивинлар кўпайиши учун қулай бўлган канализация тиндиргичларидан олинган биогаз ёрдамида ҳашаротларни ўзига жалб қилади. Қопқон қуёш нурлари тушиб тур¬ган жойга қўйилади. Унинг ичига кирган чивин юқори ҳароратдан ўлади.
Конструкция айниқса, кекса беморлар даволанадиган шифохоналарга анча маъқул келди. "Беморларнинг кўпчилиги ўрнидан туролмайди. Кечаси уларни чивинлар роса талайди. Энди беморлар тинчгина ухлашлари мумкин", дейди "Колбе" шифохонаси ҳамшираси Годфри Линох.