Машҳур режиссёр Стивен Спилберг ўзининг «Юра даври боғи» фильмини суратга олганидан кейин улкан судралиб юрувчилар – динозаврларга бўлган қизиқиш кучайиб кетди. Ҳозирги «табиат султон»ларидан ўн карра улкан ва кучли бўлган ушбу жонзотлар нақд 165 миллион йил давомида табиатда ҳукмронлик қилишган. Аммо вақти келиб оммавий қирилиб кетишган. Уларнинг асфаласофилинга жўнаш сабаблари аниқланса, бу кейинчалик одамзотнинг омон қолишига замин яратиши мумкин.
65 миллион йил аввал флора ва фаунанинг оммавий қирилиб битишига нима сабаб бўлгани ҳақидаги баҳслар анчадан бери давом этиб келмокда. Бу ҳақда "Science" журнали хабар беради. Нуфузли олимлардан иборат жамоа сўнгги 20 йилдаги палеонтология, геология, геохимия, геофизика ва иклимшунослик соҳасидаги тадқиқотлар натижаларини умумлаштириб, динозаврларнинг астероид билан тўқнашув туфайли қирилиб кетганлигига оид   тахмин энг ишончли деган хулосага келди. Сўнгти маълумотларга кўра, секундига 10000 метр тезликда ҳаракатланадиган диаметри 10 километрдан зиёд астероид Мексика кўрфази ҳудудидаги Юкатан яримороли якинида Ер билан тўқнашган. У чуқурлиги 40 километрли кратер ҳосил қилган. Астероид ва Ернинг ўзаро тўқнашуви нафақат портлаш, тошқин, буғланиш ва атмосферага улкан миқдорда тоғ жинслари отилишини вужудга келтирган, балки ер қатламларининг кучли силжиши, баландлиги 300 метрдан зиёд цунами ва мислсиз ёнғинни келтириб чиқарган. Буларнинг бари Ер тарихидаги энг йирик биоҳалокатларга сабаб бўлиб, динозаврлар ҳам қирилиб кетган.