Рассел Кроу бош ролни ижро этган «Гладиатор» фильми кўпчиликнинг эътиборига тушди. Ушбу фильмдан кейин гладиаторлар даврига эътибор кучайди. Катта саҳнада ҳам йиртқич ҳайвонлар, ҳам жангчиларга қарши курашган гладиаторлар ўз вақтининг қонли олишувлари томошаларининг «юлдузлари» эди. Шу пайтгача гладиаторлар асосан Рим империясининг «юрагида» урушишган ва ҳалок бўлганидан кейин ҳам шу ерда кўмилган, деган тахмин илгари сурарди.
Йорк шаҳридан узоқда бўлмаган жойда 80 эркакнинг кўмилган жасади аниқланди. Бу қабрларнинг ёши тахминан 2 минг йилга тенг. Аввалига бу эркаклар қатл қурбонлари бўлган, деб тахмин қилинди. Лекин кейинчалик бу тахмин ўрнини бошқа фикр эгаллади.
Янги фикр исбот бўлгудек бўлса, Буюк Британиянинг тарихини тубдан ўзгартириб юбориши мумкин. У Буюк Рим империясининг муҳим провинцияси бўлганини исботлайди. Аммо ҳаммасини бир бошдан айтайлик. Аниқланган эркак мурдаларининг олган жароҳатлари гладиаторларнинг жанг пайтида олган жароҳатларига жуда ўхшаб кетар эди. Жасадларнинг скелетларида фақат қурол излари эмас, балки йирик йиртқич ҳайвонларнинг тиш излари ҳам топилди. Олимларнинг таъкидлашича, ҳамма жасадлар баланд бўйли, бақувват эркакларга тегишли бўлиб, тана тузилиши атлетларникига ўхшаш экан. Жасадлардаги арслон тишларининг изи ушбу «атлетлар»нинг олишув майдонида нобуд бўлганлигидан аниқ далолат беради, дейди суд антропологияси доктори Майкл Висоцкий.