1 грамм никотини отни йиқитади, деб бежиз айтишмайди, ваҳоланки,  чекиш соғлиқ учун хавфли эканини ҳамма билади. Унинг қон-томир, ўпка, юрак касалликларига олиб келиши кўпчиликка маълум. Кашандалар орасида чекишга ўрганиб қолганидан афсусланадиган, аммо уни энди тарк этолмай қийналиб юрган одамлар кўп. Ана шундай кишиларнинг исталган биридан сўраб кўринг, у чекишни қандай бошлаган экан экан?
Турли мамлакатларда ўтказилган тадқиқотлар натижасига кўра, чекувчилар одатда биринчи бор бошқаларга ҳавас қилиб, кимгадир қизиқиб ёки шунчаки катталар, фильм қаҳрамонларига тақлид қилгани учун лабларига тамаки қистиришади. Никотин хуморини қондириш, чеккандан сўнг баданнинг ором олиши каби кашандалар истайдиган ҳолатлар биринчи чекишда рўй бермайди. Аксинча, тамакидан олинган илк "бўса" кўпчиликда ёқимсиз таассурот қолдиради. Лекин кейинчалик тамакига ўрганиб қолганлардан сўрагудек бўлсангиз, овқатдан кейин сигарета ўзгача маза беради, бу қизларни йигитларга жалб қилади, деб баҳона қилишади. Тайинли ишламайдиганлардан сўрасангиз ҳам, «Билмайсан-да, ишда уда чарчайман, айниқса, асабларимни айтмайсанми? Сигарета чексам, асабларим дам олади», дейдиганлар анчагина. Шу пайтгача фан бундай далилларга тайинли қарши фикр билдирмас эди. Лекин замонлар ўзгармоқда ва бу фикр негизида ҳам ҳақиқат йўқлиги ойдинлашмоқда.
Янги Зеландиянинг олимлари таъкидлашмоқдаки, чекиш ҳеч қачон асабларни тинчлантирмайди. Чекувчилар чека бошлаганида, аксинча, асаблари таранглашиб, асабий ҳолатда бўлишади ва хавотирга тушар экан.
Олимлар 2 гуруҳ одамларни, яъни чекувчилар ва чекмайдиганларни текшириб кўрдилар. Улар асосан одамларнинг руҳий ҳолатини назоратдан ўтказишди. Бу текширув натижасида маълум бўлдики, чекувчилар кўпроқ асабий ҳолда бўлишган.
Ҳозирги пайтда олимлар чекиш одамларга руҳий аҳволини таранглаштириши мумкинлигини текширишмоқда. Агар келгусида бу ҳам тасдиқланса, Ер юзидаги чекувчилар сони қисқаришига умид қилса бўлади.