Япония кино ва анимация оламига нима олиб кирди? Биринчиси, яъни кинони олганда: японларга хос даҳшат ва жангари фильмлари, самурай, ниндзялар ва албатта Такеши Китанони эслаймиз. Иккинчиси, анимацияни олганда эса айнан шу сўзни ясаган анимени олиш мақсадга мувофиқ. Айтишларича, Японияда маҳаллий аниме усталари ишлаган тўлиқ метражли мультфильмлар АҚШнинг машҳур картиналаридан юқорироқ баҳоланар экан. Бунга асос етарли. Зеро, кейинги пайтда манга ва анимега қизиқиш бутун дунёда ортиб боряпти. Покемон ва Нарутоларни бизда ҳам кўпчилик яхши танийди. Биз-ку шунчаки бу фильмларни мириқиб томоша қиламиз. АҚШда япон санъатининг ушбу йўналишларига бағишланган йирик анжуманлар ҳам бўлар экан. Мана яқинда, яъни 1-4 июлда ҳам Лос-Анжелесда аниме, манга ва косплейга бағишланган АҚШдаги энг йирик Anime Expo 2010 конвенцияси бўлиб ўтди.

Аниме ва мангани унча-бунча биламиз, косплей нима дегани? Косплей – бу экрандаги ҳаракатларни ҳаётда талқин қилиш. Косплей қатнашчилари ўзларини бирорта персонажга ўхшатишади, унинг номи билан аташади, унга ўхшаган кийим кийиб юришади, сўзлашувлари ҳам ушбу қаҳрамонни эслатади. Ҳақиқий фанатлар мана шунақа бўлади. Кўргазма Staples Center кўп тармоқли спорт комплекси ҳудудида жойлашди.

Анжумандан бошқа фотосуратлар билан танишмоқчи бўлсангиз, мана бу ерга киринг.