«Ёшлар» телеканали орқали намойиш этилган «Ҳаёт-мамот» (Lost) телесериалининг ашаддий ишқибозлари сериал муҳитини яратиш учун ҳар нарсага тайёр. Бўлмасам, Коста-Рикадаги ушбу меҳмонхонани яна қандай тушунтириш мумкин. Эсингизда бўлса, ушбу сериал сюжети бўйича турли мақсадлар билан самолётда учиб кетаётган одамлар авиафалокатга учрашади ва бир қарашда кимсасиз туюлган оролга тушиб қолишади. «Коста Верде» меҳмонхонасини яратган одамлар ҳам ўз меҳмонхонлари учун худди шундай қиёфа ҳадя этишди.

Қанотсиз қолган, аниқроғи, бошқа уча олмайдиган «Boeing 727» самолёти билан нима қилиш мумкин? Металлоломга топшириш юбориш, самолётлар қабристонидан жой ажратиш ёхуд... бироз тасаввур ва фантазия бўлса, удан ҳавода эмас, балки ерда даромад олиш айни муддао. Қандай қилиб дейсизми? Мана шу ўринда юқоридаги телесериал ёрдамга келади. Коста-Рикадаги Куэпосдан сал наридаги чўққида жойлашган «Коста Верде» отелидан ажойиб манзарани кўриш мумкин. Тинч океани соҳилидаги тропик ўрмон биқинидаги мазкур отелнинг қулай, шинам, ёғочдан ишланган ажойиб хоналари мароқли ҳордиқ чиқаришга ёрдам беради. Хуллас, танишинг, дунёдаги энг ажиб меҳмонхоналардан бири – самолётдаги отель!

Бу 1965 йилда самони кезган «Боинг 727» ретро-самолёти бўлиб, у «South Africa Air» ва «Avianca Airlines» авиакомпаниялари йўналишларида хизмат қиларди.

Самолёт каркаси қисмларга ажратилиб, Сан-Хосе аэропортидан келтирилган. Ҳар бир қисми автопоездда эҳтиёткорлик билан Мануэль Антонио чангалзорларига кўчирилган.

Ҳозир самолёт миллий боғ четидаги 15 метрли пьедесталда турибди. Бундай баландликда океан ва чангалзорлар кафтдагидек намоён бўлади. Бунинг учун самолётнинг ўнг қаноти ўрнига қурилган ёғоч платформага кўтарилса, бас.

Самолёт ичи учувчи кабинасидан думигача тик ёғочидан ишланган. Мебеллар қўлда ясалган.

Самолёт-отелда кондиционерли иккита ётоқ мавжуд – бирида улкан кровать, иккинчисида алоҳида ванна ўрнатилган. Турли тропик ҳайвонлар – маймунлару туканлар сизга қўшни бўлади. Хоналараро эшиклар ҳам тик дарахтидан тайёрланган.

«Коста-Верде» отели пляж ва Мануэль Антонио миллий боғидан 270 метр нарида жой олган, холос.

Отелда бевосита чўққида иккита бассейн бўлиб, очиқ веранда, шинам ва кенг хоналар ва балконлар сизга мунтазир.

«Коста-Верде» меҳмонхонасида дам олиш учун ҳамма нарса муҳайё. Кондиционерли хоналар, кабель ТВ, ошиқ-маъшуқалар учун эса алоҳида «эконом» тоифали 15 та хона ҳам ажратилган. Бундан ташқари отель комплекси ҳудудида алоҳида яшашни хоҳловчилар учун бунгало ҳам йўқ эмас. Ҳар бир бунгалонинг алоҳида бассейни бўлиб, океан манзарасини томоша қилиш имкони ҳам бор, албатта.

Фотосуратлар doseng.org сайтидан олинди.