Оламда ғаройиб мавжудотлар бор, ана шулардан бири гоблин-акуласидир (скапаноринх).  Бу номни у узун “бурни” ҳамда олдинга туртиб чиққан узун, майда тишли жағи туфайли олган. Гоблин-акула номини унга америкаликлар берган, русларда бу жонзот ажина (домовой) акула ёки носорог акула деб аталади.

Жонивор денгизнинг 300дан 1300 метргача  қаърида яшайди, янада чуқурроққа тушиши мумкин. 1350 метр чуқурликда ўтказилган телефон кабелида унинг тишини топишган ҳодиса ҳам маълум. Гоблин-акула Атлантика ва Ҳинд уммоннининг илиқ ва чекланган сувида, шунингдек, Африка ва Калифорния қирғоқларига яқин жойларда учрайди.

Аксарият гоблин-акулалар 3,5 метргача  ўсади ва 100 кг оғирликдаги тошни босади. Лекин йирикроқ нусҳалари ҳам учраган. Шулардан бири 3,84 метр узунликда ва 210 кг оғирликда бўлган.

"Гоблин" узун дум сузгич ва қисқа кўкрак сузгичларга эга. Ундан ташқари у ўзининг ажойиб қизғиш ранги билан ажралиб туради.  Бу ҳол терисининг хийла шишасимон тиниқлиги билан боғлиқ бўлиб, шунга кўра қон томирлари кўзга ташланиб туради.

Гоблин-акула башарасидаги тумшуқсифат кўринишдаги ўзининг катта “бурни” туфайли масофадан танилади. Катта ҳажмдаги электрҳисқилувчи ҳужайраларга эгалиги туфайли бундай бурун денгизнинг қоронғи чуқурликларида ўлжани топишга ёрдам беради.

50та катта ва ўткир тишлар билан қуролланган супержағи ўлжани тез ва осон тутиб олишига имкон беради. Бу тишлар бир неча қатор билан ўрин олган. Юқори жағда уларнинг 26таси, пастда 24таси жойлашган. Ўлжани сезгани ҳамон у махсус мушаклар ёрдамида кутилмаганда жағини олдинга чиқаради ва олдинги ўткир тишлари билан ўлжага ёпишади. Ортки тишлар моллюскаларнинг чиғаноқлари ва қисқичбақасифатларни ғажиш учун хизмат қилади.

Бу акулалар денгиз ва уммон чуқурлигида "искаб топган" балиқ, кальмар, каракатица, саккизоёқ ва турли қисқичбақасифатлар билан озуқланади.

Гоблин-акулалар тана оғирлигининг 25 фоизини унинг ...жигари ташкил этар экан. Буни эшитиб таажжубга тушиш мумкин. Лекин, гап шундаки, жигар денгиз ҳайвони учун сузиш пуфаги бўлиб хизмат қиларкан. Тананинг шу аъзоси кичик ҳажмда бўлганида у ўз ўлжаси ортидан шундай тез ҳаракатлана олмасди.

Бу акула тухумсиз болалайдиган турга киради. Аммо ўта камёблиги туфайли аниқ фикр билдириш мушкулдир. У овчилик саноатига аҳамиятсиз. Инсон тушишга ноқобил бўлган чуқурликда яшаши учун бизга хавфсиз ҳисобланади.