Анжелина Жолини билмайдиган одамлар жуда кам. Айниқса, бизнинг сайтимиз ўқувчилари орасида. Ҳар қандай соҳибжамоллар рейтингларида доим биринчи бешликка кирган ушбу актриса кинони тарк этиш ҳақида эълон қилди. У шунчаки уй бекаси бўлиш ниятида эмиш. Энжининг хулқи ва энергетикасини билган одамлар бунга ишониши жуда қийин. «Мистер ва миссис Смит» киносининг асосий аёл образини яратган одам жимгина уйда бола боқиб ўтиришини ҳаёлингизга келтира оласизми? Мен ҳам йўқ. Шундай экан, тез орада акс фикр билдирилишига умид қилиб қоламиз. Агар юқоридаги гапнинг ўзи оммавий ахборот воситаларининг навбатдаги «ўрдаги» бўлмаса (русларда ёлғон миш-миш «утка» - ўзбекча ўрдак дейилади)...

Нима бўлганда ҳам, хорижий ОАВ гапига қараганда, Жоли шу пайтгача бўйнига олган барча мажбуриятларни бажариб бўлгач, бошқа лойиҳаларга имзо чекмас экан. У касбидан «бадарға» бўлиб, ўзини оиласига бағишларкан. Анжелина кинога миннатдорчилик билдирди, чунки айнан ушбу санъат унга шон-шуҳрат ва пул келтирди. Лекин бошқа аёллар каби, унга ҳам турмуш ўртоғи ва фарзандлари касбидан кўпроқ аҳамиятга эга. Ҳозир эса у томошабинларга қараганда кўпроқ оиласига керак эмиш (бизга қанчалик керак эканлигини биладими ўзи?). Болалари (ҳозирча улар олти нафар) уни фақат съемкалар орасидаги бўшлиқлар вақтида эмас, мунтазам кўриб туришларини истаркан. Актриса яна бир неча фильмда суратга тушиб, кейин суюкли хотин ва меҳрибон оналикни бўйнига олармиш. Кўрамиз ҳали...