Қайси Капурни деб сўрарсиз? Раж Капурни эмас, ҳар ҳолда. Шу кунларда бошқа Капур – Сонамнинг хурсанд бўлишга ҳар қанча ҳаққи бор. Унинг сўнгги лойиҳаси - «Ишқий воқеаларни жиним суймайди» (I Hate Luv Storys) фильми мухлисларда муваффақият қозонди. Шу билан бирга Голливуддан иккита таклиф олди. Мана буни орзунинг ушалиши деса бўлади.

Голливуд комедия юлдузи Бен Стиллер ўзининг навбатдаги «30 дақиқа оралиғида» (30 Minutes Or Less) фильмида Сонамни кўришни истади. Ўттиз миллион долларга ишланаёган ушбу фильмни режиссёр Рубен Флейшер суратга олади, бош ролларни Жесси Эйзенберг ва Дэнни МакБрайд ўйнаши кўзланган. Айтишларича, бунга Анил Капур «айбдор» экан. У Лос-Анжелесда Бен Стиллер билан учрашганида Сонам иштирокидаги «Айиша» (Aisha) фильмидан қисқа ролик кўрсатган. Кўп ўтмай, Стиллер электрон почта орқали Анилга мактуб йўллаб, Сонам ижросини «фантастик» деб баҳолаган ва ўз фильмига таклиф қилган.

Лекин Сонам Америкага йўл олиши ҳозирги пайтда бироз мушкулроқ кўринади. Чунки у кўплаб фильмларга бириктирилган. У Акшай Кумар билан «Сиздан миннатдорман» (Thank You) ва Шаҳид Капур билан «Mausam» фильмларида чиқиши, шунингдек «Айиша» (Aisha) фильми промоушинида иштирок этиши керак.

Дарҳақиқат, Капур хонимга яна бир таклиф тушган. Бу Софи Лорен ва Карло Понтининг ўғли бўлмиш Эдуардо Понтининг янги лойиҳасидир. Сонам суратга тушишга таклиф қилинган «Das» фильми Ҳиндистонда суратга олиниши кутилмоқда.

Хуллас, Сонам Капур бугунги кунда жуда банд ва унга халақит бермайлик.