Дисней ҳақида нималарни биламиз? Кўнгилочар томошалар, болалар учун махсус қувонч боғлари, шоу-бизнеснинг турли қирралари мазкур ном билан бевосита боғлиқ.

Дисней кинокомпанияси томонидан тақдим этиладиган ва ҳар биримизнинг қувончимиз манбаига айланган мультфильмларни танимай иложи йўқ. Қирол Шер, Соҳибжамол ва Махлуқ, Аладдин (бизнингчасига, Оловуддин), Оққоройим ва етти гном каби кўплаб эртаклар қаҳрамонларини танимайдиган одам орамизда топилиши ўта мушкул. Хўш, мультқаҳрамонлар учун бош бармоғимизни букамиз.

Энди киноларга ҳам бир назар ташласак. Кариб денгизи қароқчиси Жек Чумчуқвой (Jack Sparrow), Нарния оламига тушиб қолган болакайлар, миллий хазиналар изловчиси Бен Гейтс, афсунгар ва унинг шогирди кабилар ҳам аксарият одамларнинг ёдига тушиши шубҳасиз. Демак, кино образлари учун кўрсаткич бармоғимизни букишга навбат.

Нафақат болалар, балки катталар ҳам маза қилиб дам оладиган, дунёнинг уч қитъасида жойлашган кўнгилочар боғларини айтмайсизми?! Диснейлэнд кўнгилочар боғларига ташриф буюришга кўпчиликнинг қурби етмаса, аниқроғи, кармони кўтармаса-да, уларни билмаган замонавий одамларни топиш ҳам осон кечмайди. Диснейлэнд учун энг узун бармоғимизни ажратамиз.

Шу билан тамом, дейсизми? Бироз адашасиз. Одамлар турмуш қураётганда асқотадиган бармоғимиз учун ҳам навбат етиб келди. Яқинда «Disney Dream» круиз кемаси Папенбургдаги Meyer-Werft кемасозлик верфини тарк этди. Бу Германияда қурилган энг йирик кема ҳисобланади. Узунлиги 340 метрдан иборат круиз лайнери бортига бирваракайига 4 минг киши чиқиши мумкин. Кема Дисней номи билан боғлиқ экан, табиийки, у кинотеатрлар, болалар ўйнаш майдонлари, чўмилик бассейнлари, шунигндек сув горкалари билан жиҳозланган.

Disney Cruise Line компаниясига тегишли Disney Dream круиз кемаси 2011 йил 26 январда Флорида штатидаги Канаверал портидан илк марта саёҳатга жўнаши режалаштирилмоқда.

Дисней компанияси вакилларининг айтишларича, лайнер жуда нуфузли ва шинам бўлиб, кўп томондан Дисней киноиндустриясини эслатади. Қизил ва ёрқин тутун трубаси машҳур мультфильмларда тез-тез учрайди. Унинг савдо маркаси ҳам туширилган. Кеманинг олд қисмига эса тамға (эмблема) сифатида капитан кийимидаги Микки-Маус тасвири туширилган. Хуллас, қуйидаги расмларни кўриб, ўзингиз тасаввур қилаверинг.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

Манба: Etoday