Йилнинг хатолари энг кўп фильмлари рейтинги

Физиканинг асосий қонунларидан бирида айтилишича, бордан йўқ, йўқдан бор бўлиши мумкин эмас. Ҳеч бир вазиятда, ҳеч қанақасига. Ҳатто бошлиғингиз айтган бўлса ҳам, тимсоҳ пастлаб учса – учадики, бордан йўқ бўлиши ҳечам мумкин эмас. Бу ҳодиса фақат Гарри Поттер оламида рўй бериши эҳтимолдан холи эмас.

Бироқ баъзида ҳатто физика қонунларига зид ҳолларни ҳам кўзимиз илғаб қолиши мумкин. Қўрқиб атрофингизга аланглашни бас қилинг. Бундай ҳолларни ҳаётда эмас, балки экранда кўрамиз. Тўғриси, кейинги йилларда кинолардан турли хатоларни топиш ўзига хос хоббига айланди. Бу айниқса катта маблағ эвазига суратга олинган фильмларга тааллуқли. Тўғри-да, оддий саҳналарни олиш учун фалон пул сарфлашади, майда-чуйда нарсаларга эса эътибор беришмайди. «Титаник» ва «Бешинчи элемент» каби фильмларнинг камчиликлари муҳокама этилмаган жой қолмади. Мана 2010 йилда суратга олинган фильмларнинг камчиликлари ҳам санаб чиқилди. Moviemistakes.com портали ўтган йилда суратга олинган ва энг кўп камчиликларга йўл қўйилган фильмлар рейтингини тузиб чиқди. Уларда ҳам фактик, ҳам сюжетли нуқсонлар кўплаб учрайди.

Биринчи ўринга режиссёр Жон Фавро суратга олган «Темир одам - 2» фильми чиқди. Мутахассислар нақд 200 млн. долларга олинган фильмдан 45 та сезиларли нуқсон топишган. Улар орасида интерьердаги буюмларнинг бордан йўқ бўлиши, бир саҳнанинг ўзида бош қаҳрамонларнинг кўриниши ўзгариб қолиши, суратга олиш жиҳозларининг кадрга тушиши кабилар мавжуд.

Мазкур ғайриоддий рўйхатнинг иккинчи ўрнини режиссёр Жо Карнахан томонидан суратга олинган «А жамоа» картинаси эгаллади. Ундан 37 та хато топишди. 33 та хато ўтказиб юборилган Мартин Скорсезенинг «Қарғишга учраганлар ороли» фильми учинчи ўринда турибди.