Юлдузларнинг жаҳли бурнининг учида эмас, ундан бир қарич нарида жойлашган. Хафагарчилиги ҳам ундан узоқда эмас. Рост-да, ахир улар шуҳрат зинапоясидан кўтарилгунларича қанчадан қанча қийинчиликларни енгишга тўғри келган. Энди бўлар-бўлмасга хафа бўлиб қолишга ҳам рухсат. Мисол учун, шу кунларда юлдузли эр-хотин Том Круз ва Кэти Холмс актриса Энн Хэтэуэйдан хафа бўлиб қолишди. Воқеа шунгача етиб бордики, Том ва Кэти жорий йилда бўлиб ўтадиган «Оскар» тантанасида қатнашишдан ҳам бош тортишмоқда.

Гап шундаки, Энн ўтган йилнинг ноябрь ойида бўлиб ўтган Saturday Night шоусида қатнашиб, Кэтига пародия кўрсатган. Бу пародияда у Том Круз рафиқаси камера олдида ўзини қандай тутиши ва гаплашишининг устидан кулган. Тўғри, кўп ўтмай, Хэтэуэй бу актрисанинг ўзига эмас, у ижро этган роллардан бирига пародия эди, дея ўзини оқламоқчи бўлди. Аммо шоуни кўрганлар коса остидаги нимкосани излаб ўтирмай, тўғридан-тўғри косанинг, йўғ-е, Кэтининг устидан кулишган. Табиийки, юлдузли жуфтлик бундай шармандаликни кўтара олмади.

Энди Крузлар оиласи Энн қатнашадиган ҳар қандай тадбиру учрашувлардан ўзини олиб қочмоқда. Дарҳақиқат, бир неча йил аввал Кэти ва Энн яқин дугона бўлиб, биргаликда концертларга боришар, оғир кунларда бир-бирларига далда бўлишар, имкон борича бир-бирларини қўллаб-қувватлашга интилишарди. Шунинг учун ҳам Энн унинг устидан кулганини кўриб, ўзини қўярга жой тополмай қолди.

Бунга «Оскар» тантанасининг нима алоқаси бор, деб сўрарсиз? Ахир ушбу церемонияни айнан Хэтэуэй олиб бориши эълон қилинди. Шундай экан, жорий йилда «Оскар» тантанасига йўлингиз тушса, юлдузлар орасидан Том Круз ва Кэти Холмсни изламанг. Уларнинг шоуда иштирок этиши даргумон.