Футбол бўйича жаҳон чемпионатининг гуруҳ ўйинлари якунига етиб, эндиликда ўйинда мағлуб жамоа бемалол жомадонларини йиғиб кетавериши мумкин бўлган палла бошланди. Аммо чемпионатнинг ўтган даврига назар ташласак, ижобий жиҳатлар билан бирга қатор нуқсонларга ҳам дилимизни хира қилиши тайин. Бундай кўнгилсизликларнинг асосийларидан бири – ҳакамларнинг кўплаб хатога йўл қўйишидир. Ўзбекистонлик ҳакамга нисбатан жиддий эътирозлар бўлмаса-да, бошқа «хуштак усталари» ҳам бундай натижа билан мақтана олмайдилар. Ди-жей Пиллигримнинг қўшиғидаги «Миллионлар ўйини»ни томоша қилиш учун унинг бошқа қўшиғидаги «Кўк чой»ни ичиб асабларни тинчлантиришга тўғри келмоқда. Эҳ, аттанг!

10. Харри Кьюэллнинг қизил карточкаси

Гана – Австралия ўйини энди қизғин тус ола бошлаганди. «Соккеруз» тез голни уриб, «қора юлдузлар»ни тўхтатишга шай туришганди. Кутилмаганда Жон Менса кучли зарб берди ва унинг йўлини Харри Кьюэлл тўсди. Тўп елкага тегди, атайлаб қўл билан ўйнашга ҳожат ҳам бўлмади. Аммо Роберто Розетти шу куни, «албатта, қизил карточка кўрсатаман», деб майдонга тушганми, дейман, огоҳлантирувчи сариқ карточкани излаб ўтиришни ўзига эп билмади ва дарҳол пенальти белгилаб, қизил карточкани кўрсатиб қўя қолди. Кьюэлл анча вақтгача ўзига келолмай, майдонни тарк этишни билмай юрди. Бироқ таниш мақолни бироз ўзгартириб айтадиган бўлсак: чиқарилган қизил карточка – отилган ўқ бўлди-қолди. Кейинчалик бу карточка учун айбни Люк Уилкшир ўзига олди.

9. Каканинг ўйиндан четлаштирилиши

Кот-д’Ивуарга қарши ғолибона ўйинда Кака сўнгги дақиқаларда бир эмас, нақд иккита сариқ карточка олишга улгурди. Иккинчиси Кадер Кейт билан бироз тегиниб кетгани учун кўрсатилди. «Галатасарай» форвардини аввалига Луис Фабиано туртиб юборди, кейин эса Каканинг тирсагига туртилиб кетса бўладими?! Абдул Кадер ўйлаб ўтирмай, ўроқ теккан ўт сингари шартта чимга думалади. Стефан Ланнуа ҳам бундай «ажойиб актёрлик маҳоратини» юқори баҳолади ва сариқ карточкасига қўл чўзди.

8. Словаклар ва ЖАР ҳакамлари

Словакларнинг турнирдаги биринчи ўйинларини кўрган одам бир ярим ҳафта ўтар-ўтмас Италия терма жамоасини доғда қолдиришига ҳеч қачон ишонмасди. Владимир Вайсснинг жамоаси тутуруқсиз ўйин кўрсатиб, сўнгги дақиқаларда Янги Зеландия устидан ғолибликни қўлдан бой берди. Словакияликларнинг ягона тўпи Роберт Виттек томонидан офсайддан киритилди. ЖАР ҳакамлари голни бекор қилиш мумкинлигини билишмаган бўлса керак.

7. Хайнце голи ва Самуэлнинг қучоғи

Габриэль Хайнценинг голи Аргентина терма жамоасига илк ғалабани келтирди. Бироқ икки кундан кейин ФИФА ҳакамлар қўмитаси қатъий ҳукм чиқаришди: Хайнценинг голи ҳисобланмаслиги лозим эди. Немис ҳаками Вольфганг Штарк аргентиналик Вальтер Самуэлнинг нигериялик Чинеду Обасига нисбатан қўпол ўйнаганини кўрмай қолганмиш. «Интер» ҳимоячиси ўз рақибини жуда қаттиқ эҳтирос билан қучоқлаб олган экан. Тўғри, бу аргентиналикларнинг ғалабасини бекор қилолмади. Нигерияликларга эса фақат Самуэлнинг қучоғи қолди, холос.

6. Луис Фабианонинг «кўринмас» қўли

Диего Марадонани эслаганда унинг ажойиб ўйини билан бирга «илоҳий» қўлини ҳам эсламай ҳеч иложи йўқ. Ҳозирги ўйинчилар футбол «шаҳзодасининг» ўйинига тенглашиш ўрнига кўпроқ қоидага зид бўлган қўл билан ўйинидан «нусха кўчиришга» ҳаракат қилишяпти. Француз ҳужумчиси Анри бир неча бор шундай номақбулчиликда кузатилганди. Жаҳон чемпионатида эса ҳатто тўп билан бирга туғиладиган бразилияликлар ҳам «илоҳий» қўлни канда қилишмаяпти. Луис Фабиано Кот-д’Ивуарнинг дарвозасига иккинчи голни ураётганида бемалол қўли билан икки марта тўпни тўғрилаб олишга муваффақ бўлди. Ҳакам эса кўриб улгурмади, шекилли, ҳужумчининг ўзидан сўраб қўя қолди. Ким ҳам айбини бўйнига оларди, дейдиган одам майдонда топилмади. Луиснинг қилиғини тушунмаганлар эса Фабианога «иккинчи Анри» деб лақаб ҳам қўйишди.

5. Италиянинг пенальтиси

Янги Зеландия терма жамоаси омад кулиб боқиш у ёқда турсин, нақд хохолаб кулиб қорнини ушлаб қолганда ҳам онда-сонда жаҳон чемпионатининг финал қисмига чиқишга муваффақ бўлади. Бу ерда эса уни қатъий ҳакамлар кутиб олишади. Худди Карлос Батресга ўхшаган. Даниэле де Росси жарима майдонида тўпга чўзилганида Томми Смит унинг футболкасини бироз тортиб қолди. Даниэле эса худди поезд тортиб қолганидек ағдарилиб тушди. Ушбу пенальти бўлмаганда, эҳтимол, Янги Зеландия ғолиб ҳам бўлармиди?! Аслида эса «буюк» ничьяга қониқишга мажбур бўлишди.

4. Тим Кэйхиллнинг қўли

Австралияга қарши ўйинда Сербия терма жамоасининг тақдири ҳал қилиниши керак эди. Бироқ «соккеруз» кутилмаганда жамулжам бўлиб, иккинчи таймда икки марта Владимир Стойковични «хафа» қилишди. Голлардан бирини Тим Кэйхилл киритди. Ўйин сўнггида эса ўз жарима майдонида қўли билан ўйнади. Ўйиндан кейин ушбу ҳолат кўплаб баҳсларга сабаб бўлди.

3. Валон Бехрамининг четлаштирилиши

«Вестхэм» хавбеки майдонда ярим соатгина ўйнай олди. Ўйин пайтида Артуро Видаль яримҳимоячининг тирсагидан чунонам қўрқиб кетдики, ҳеч иккиланмай чимга гурсиллаб тушди. Ҳакам Халил Аль-Гамди унинг актёрлигига қойил қолди ва қизил карточкасини чиқарди. Карточка Бехрамига кўрсатилгач, Валон анча пайтгача реферининг қарорини тушунмай юрди.

2. Йоанн Гуркюффга кўрсатилган қизил карточка

Сўнгги турда французлар плей-оффда курашни давом эттириш учун умид қилишлари мумкин эди. Бунинг учун «атиги» ЖАР терма жамоаси устидан ғалаба қозониш керак эди, холос. «Бафана Бафана» биринчи бўлиб гол уришди. Кўп ўтмай, француз ўйинчиси Йоанн Гуркюфф ўйиндан четлаштирилди. «Бордо» яримҳимоячиси юқоридаги тўп учун курашда тирсаги билан Макбет Сибайяга тегиб кетди. Дарҳол Йоанн пешонаси тагида қизил карточка пайдо бўлди, Сибайя эса олти жойидан тикилганини айтиб, жаҳон чемпионати ҳақида шундай ачинарли хотира қолишини «куйлади».

1. АҚШнинг бекор қилинган голлари

Морис Эду АҚШ терма жамоасига тарихий ғалабани келтиришига бир баҳя қолди. Бунга рақиблар эмас, ҳакамлар қаршилик қилишди. Словенияга қарши ўйинда 0:2 ҳисоби билан мағлуб бўлаётган америкалилар ҳисобни тенглаштиришга муваффақ бўлишди. Эдунинг голи ғалаба келтириши керак эди, лекин ҳакам ғалати сабабларга кўра уни бекор қилди. Ўйин қоидаси қаерда бузилганини Коман Кулибалининг ўзи ҳам билмаса керак, бироқ ўйин тугаганида таблода иккита иккилар ёниб турарди, холос.

Тақдир америкаликларга қарши «ҳазилини» Жазоир терма жамоасига қарши ўйинда ҳам давом эттирди. 20 дақиқада Клинт Демпси ҳисобни очди, лекин ён ҳакам тирноқдан қидириб, офсайдни топиб олди. Франк де Блекере шеригига ишонди ва голни бекор қилди.

Жаҳон чемпионати ҳали тугагани йўқ. Юқорида эса биз гуруҳ ўйинлари ҳақида сўз юритдик. Навбатдаги ўйинларда мағлуб бўлган жамоа Жанубий Африка билан хайрлашишга мажбур бўлади. Шундай экан, ҳар бир хатонинг қадри бир неча баробар ортади. Умид қиламизки, юқоридаги рўйхатни плей-офф ўйинларидан кейин давом эттиришга ҳожат бўлмайди.