Куни кеча Испаниянинг «Барселона» жамоаси учун тўп сурадиган ушбу футболист «Олтин тўп»га сазовор бўлди. Шунинг учун у ҳақда маълумот беришга аҳд қилдик.

Лионель Андрес Месси (1987 йилда Росариода туғилган) – аргентиналик футболист, Испаниянинг «Барселона» ва Аргентина терма жамоси учун тўп суради. Оммавий ахборот воситалари уни «янги Марадона» деб аташади. Техникаси жуда юқори бўлган замонавий футболчилардан бири.

Болалик йиллари

Месси 1987 йил 24 июнда Аргентинанинг Росарио шаҳрида туғилди. Отаси – Хорхе Месси фабрикада ишчи, онаси Силия Месси фаррош бўлган. Отасининг оиласи Италиянинг Анкона шаҳридан бўлган, уларнинг аждоди Анжело Месси 1883 йилда Аргентинага кўчиб ўтган. Унинг Родриго ва Матиас исмлари акалари, Мария Соль исмли опаси бор. Месси беш ёшида отаси Хорхе мураббийлик қилган маҳаллий «Грандоли» футбол жамоасида футбол ўйнашни бошлаган. 1995 йилда у Росариодаги «Ньюэллз Олд Бойз» жамоаси учун тўп сура бошлади. 10 ёшида болада ўсиш гормони соматотропиннинг танқислиги аниқланди. Месси билан қизиққан «Ривер Плейт» даволаш учун етарли маблағ топа олмади. Шунда унга «Барселона» жамоаси спорт директори Карлес Рексач ёрдамга келди. Каталонияда бўлажак футбол юлдузининг қариндошлари борлиги сабабли Карлес боланинг истеъдодидан хабардор эди. Месси ёшлигида отаси билан Барселонага йўл олди. Унинг ажойиб ўйинини кузатган «Барселона» даволаниш учун ҳақ тўлашга рози бўлди, бироқ бунинг учун Месси Испанияга кўчиб ўтиши лозим эди. Мессилар оиласи Европага кўчиб ўтишга рози бўлди ва Лионель ёшлар жамоаси учун ўйнай бошлади. У тез орада ўз ўйини билан мухлислар эътиборини қозонди.

Шахсий ютуқлари

Месси 2005 йил ёшлари орасида жаҳон чемпиони (турнирнинг энг яхши ўйинчиси ва тўпурари деб тан олинган), «Барселона» таркибида уч карра Испания чемпиони (2004/05, 2005/06 ва 2008/09 мавсумларда). 2007 ва 2009 йилларда Испания биринчилигининг энг яхши ўйинчиси деб эълон қилинган. 2005 ва 2007 йилларда Аргентинанинг энг яхши ўйинчиси бўлган. Шунингдек Чемпионлар лигасининг икки карра ғолиби (2005/06, 2008/09), 2009 йилда Лиганинг энг яхши тўпурари деб аталган.

2009 йилда Лионель Месси УЕФА нуқтаи назаридан Европа футбол клублари орасида энг яхши футболист ва Чемпионлар лигасининг энг яхши ҳужумчиси мақомига сазовор бўлди.

Месси шунингдек Европанинг энг яхши футболчиси сифатида 2009 йилнинг «Олтин тўпи» соҳиби. 2009 йил 19 декабрда Абу-Дабида финал ўйинида ғалаба тўпини урди ва жамоалар орасида жаҳон чемпионига айланди.

2009 йил 21 декабрда эса Лионель Месси ФИФА нуқтаи назаридан йилнинг энг яхши футболчиси деб тан олинди ва «Бриллиант тўп» мукофотига сазовор бўлди.

Жорий йил 10 январда эса Месси ўтган 2010 йилнинг энг яхши футболчиси деб тан олинди.

Терма жамоа таркибида

Месси аввалига Испания миллий терма жамоасида иштирок этиш учун таклиф этилган. Аммо бу таклифни рад этиб, Аргентина ёшлар жамоаси таркибида тўп суришга аҳд қилди. Бу унинг асл Ватанига қанчалик содиқ эканини яққол кўрсатади. 2004 йилда Парагвай жамоасига қарши ўртоқлик учрашувида Аргентина ёшлар терма жамоаси таркибида илк марта қатнашди.

2005 йил июнида Месси Голландияда бўлиб ўтган ёшлар орасидаги жаҳон чемпионатида шоҳсупанинг юқори поғонасига кўтарилишга муваффақ бўлди. Бу турнирда у 6 та тўп киритиб, энг яхши тўпурар деб топилди ва чемпионатнинг энг яхши ўйинчиси сифатида олтин тўпни қўлига олди.

Ўша йили 4 августда Хосе Пекерман истеъдодли футболчини Аргентина миллий терма жамоасига таклиф этди. Бироқ ўйинда атиги 3 дақиқа ўйнаб, қизил карточка туфайли уни тарк этди. Аргентина учун илк расмий ўйинини Месси 2005 йил 3 сентябрда ўтказди. 2006 йил жаҳон чемпионатининг саралаш раундида у Парагвай терма жамоасига қарши 80-дақиқада ўйинга тушди. Биринчи тўпини эса Хорватияга қарши ўртоқлик ўйинида киритди. 2006 йил жаҳон чемпионатида Сербия ва Черногорияга қарши ўйинда терма жамоа таркибида у биринчи расмий тўпини киритишга муваффақ бўлган.