Кўп қаватли бинолар нима учун ихтиро қилинганини биласизми? Шунчаки бир киши бошқасининг тепасида яшаб, том маънода унинг устидан кулиши учун эмас, албатта. Аҳоли зичлиги тобора ортиб бораётган кейинги пайтларда ҳар бир квадрат метр ҳисобда. Шуниг учун бўлса керак, баъзи уйларнинг балконига чиқмоқчи бўлсангиз, торлигидан каллангиз кирса, бошқа жойингиз сиғмай қолади. Табиийки, ошхоналар ҳам шунга яраша қурилган. Энди тасаввур қилинг, бундай ошхонада норин пиширмоқчи бўлсангиз? Тўғрашдан аввал хамирини деразадан ташқарига чиқариб осиб қўясизми? Ахир ошхонанинг ўзига сиғмайди-ку.

Афтидан бу муаммо хорижда ҳам одамларнинг бошини қотиради чамаси. Шунинг учун замонавий дизайн ва архитектура тор жойдан имкон борича кенг шароитлар яратишга интилмоқда. Қуйидаги ошхона мебели ҳам айнан шунга қаратилган. Ҳам шакли, ҳам ўлчамлари билан душ кабинасини эслатадиган мазкур ошхона мебели кундалик эҳтиёжларнинг деярли барчасини қондиришга интилади. Бунинг уддасидан чиқадими ёки йўқлиги бошқа масала – ахир ҳар кимсанинг эҳтиёжлари турлича эмасми?

Мазкур high-tech Circle kitchen ҳам мўъжаз, ҳам қулай, ҳам чиройлидир. Уни ҳеч иккиланмай янги авлод мебели деб аташ жоиз. Ўз ўқи атрофида 180 градусга айланадиган ушбу ошхона мебели атиги 1,8 м майдонни эгаллайди. Кўриниб турибдики, унга замонавий ошхонанинг барча жиҳозлари ўрнатилган. Ушбу лойиҳани CC Concept LTD мутахассислари ишлаб чиқишган.