Айтишларича, қуёшдан сақловчи кўзойнакларни биринчи бўлиб эскимослар, яъни шимолий қутбда яшовчилар тақиб юришган экан. Агар улар буни қуёш нуридан сақланиш мақсадида ишлатган бўлсалар, ҳозирги вақтда бу эркаклар ва аёллар учун ўзига хос «буюмидир». Бунинг устига бизнинг қуёш нурлари сероб бўлган ўлкамизда кўзойнаклар жуда қўл келади. Ахир кўзлар инсон қалбининг кўзгуси, деб бежиз айтишмайди. Соҳибжамол қизларимизнинг фақатгина қалбини эмас, ҳатто қалбининг аксини ҳам тиниқ ойнадек сақлаб қолиш биз эркакларнинг бурчи эмасми? Бунда эса кўзойнаклар бизга жиддий ёрдам бериши шубҳасиз. Эркаклар модаси айтайин ўзгармаган, шунинг учун асосий эътиборни аёллар кўзойнагига қаратамиз.
Бугунги кунда дизайнерлар кўпгина кўзойнак моделларини тавсия этишмоқда, аслида эса уларнинг баъзилари аллақачон «модний» эркак ва аёлларнинг коллекциясидан ўрин олиб улгурган. Мисол учун, томчи кўзойнаклар, тўғрироқ қилиб айтганда, «авиаторни» олайлик - унинг асл исми ана шундай, чунки кўзойнакнинг бу моделини Bausch & Lomb компанияси айнан олий тоифали учувчилар учун ишлаб чиқарган. Биринчи «авиатор» кўзойнаги 1937 йилда Ray Ban номи билан сотувга чиқарилган. Бугун уларни Доменико ва Стефано - D&G баҳорги ва ёзги коллекциясида таклиф этишмоқда.
Думалоқ ва тўртбурчак, капалак кўринишли, ранг-баранг хилдаги қалин гардишли кўзойнакларни шунчаки ранг-баранглик учун ёки бошқалари юзнинг тузилишига тўғри келмаганида тақиш мумкин. Бу мавсумда барча турдаги моделлар ўз жозибасини йўқотмаган. Агар классик турдагилари ҳиқилдоққа келган бўлса, бошқалардан бир қадам илгарилаб кетган Chanel ва Prada таклифлари бор. Chanel кўзойнаклари, XVII асрнинг француз гўзаллари таққан ниқобни эслатади. Prada кўзойнаклари ҳам бу мавсумда ажойиб ва ёрқинлиги билан ҳаммадан ажралиб туради. Бундай гўзалликка эътибор бермай, унга лаққа тушмай ҳеч иложи йўқ.