Бизнинг ота-оналаримиз доимо покиза бўлиб юришимизни, овқатланишдан аввал ёки кўча чангитиб, уйга қайтганимиздан кейин қўлимизни ювишимизни таъкидлашади. Аслида эса бунинг бошқа фойдали тарафлари ҳам бор экан. Америкалик олимларнинг айтишича, тозаликка риоя қилиш, ювиниш инсонни турли шубҳа-гумонлардан асрайди. Одатда инсон икки ёки ундан кўпроқ вазиятларда бир қарорга келолмай боши қотади. Бир қарорга келганидан кейин ҳам афсусланиб юради.
Масалан, сиз оқ рангли автомобиль сотиб олдингиз. Пулни тўлаб, расмийлаштириб бўлганингиздан кейин ҳам қарорингиз сизни унчалик қониқтирмайди. Балки бошқа рангдагисини олганимда маъқулроқ бўлармиди, деган фикрлар қийнайди. Ана шундай вазиятдан қутилишнинг энг осон йўли – қўлни ювиш экан, деб эълон қилади «Science» журнали. Нима бўлганда хам инсон тозаликка, гигиенага қаттиқ риоя қилгани маъқул. Ушбу жараён ҳозирги вақтгача юзлаб одамларда синаб кўрилган ва улар кўзда тутилган натижаларига эришишган. Тўғри, сотиб олган оқ машинангиз қизил ёки қора рангли машина бўлиб қолмайди, бироқ қўлингиз кири билан бирга қалбдаги шубҳа ва гумонлар ювилиб кетса, нимаси ёмон?