Кичкина болалар катталарга ўхшайман деб уларнинг нарсаларини олиши оддий ҳол. Айниқса, кичкинтой қизчалар опалари ёки оналарининг пойабзалини кийиб олиб юрганини кўп бор кўрганмиз. Улардан бу нарсани олиб қўйгудек бўлсангиз, бутун маҳаллани бошга кўтариб дод-вой солади, қайтариб бермагунингизга қадар йиғлашни қўймайди. Буни тушунса бўлади, зеро, болалар катталарга тақлид қилишади. Лекин болаларнинг нарсаларига катталар талпинганига нима дейсиз? Қуйида бир нечта шундай ҳолни кўриб чиқамиз.

Ўйинчоқ машиналар

Буларни тўплайдиган коллекционерлар дунёда анчагина топилади. Каттасига етмагани учун кичкинасини сотиб олиб, ўзини алдайди-да, дейиш ҳақиқатдан анча йироқ. Чунки баъзи ноёб тўрт ғилдиракли ўйинчоқлар катта машиналар нархида сотилиши мумкин. Шунинг учун ақлини еб, болалигига қайтибди, дейиш ноўрин. Ваҳоланки, уйингизда катта автосаройингиз бўлганига не етсин?!

Болалар овқати

Гўдаклар учун мўлжалланган сабзавот ва мевали пюреларга катталар орасида ҳам қизиқиш катта. Озишни истаган баъзи аёллар бундай сабзавот ва меваларни тановул қилишни канда қилишмайди. Гўдаклар кашаларига келсак, таркибида протеини бўлгани боис штанга ва гантель кўтарадиган йигитчалар уларни паққос туширишга тайёр. Айтишларича, ҳаммага ҳам тўғри келавермайди, аммо таъсир этган ҳоллар ҳам талайгина.

Ўйин приставкалари

Аввалига болалар ва ўсмирлар учун ишлаб чиқилган Нинтендо ва ПлейСтейшнлар тез орада ўттиз ёшли йигитларнинг энг хуш кўрган ўйинчоғига айланди. Уларни ишлаб чиқарувчилар ҳам тез орада англаб етишди: бундай приставкалар аллақачон катталарнинг овунчоғи сифатида талқин этилмоқда.

Карлсон

Аслида ҳаммамизга мультфильм ҳам, китоб ҳам ёқади. Лекин мультфильм айнан болаларга мўлжаллаб ишланган бўлса-да, Астрид Линдгреннинг асари ҳақида ҳеч иккиланмай бундай деб бўлмайди. «Эрталаблари ҳали ҳам коньяк ичасанми? Ҳа ёки йўқ?» каби фалсафий саволлар, икки маъноли ҳазилларни ҳар бир болакай ҳам тушунавермайди. Бошқа томондан олганда, бу китобни болаликда ўқиган афзал.

Комикслар

Америкаликлар ишлаб чиққан суратли ҳикоялар анча вақтгача болаларнинг севимли китобчалари бўлиб келган. Лекин кейинги пайтларда Голливуд улар ҳақида кўплаб дабдабали киноларни суратга олдики, одамлар бу фильмлар асосида ётган комиксларни ҳам хуш кўриб мутолаа қилишга киришишди. Интернетда ҳам кўплаб комикслар таклиф этадиган сайтлар мавжудки, уларга асосан катталар киришади. Тўғри, японияликлар ишлаган катта кўзли қизлар тасвирланган мангалар ҳам бўлиб уларни томоша қилишни хуш кўрадиган катталар ҳам топилади, аммо бу умуман бошқа масала.

Хуллас, болаларга аталган, бироқ катталар учун ҳам жозибали туюлган нарсалар анча-мунча. Биз атиги бештасини санаб ўтдик. Ўтириб, мулоҳаза қилгудек бўлсангиз яна талайгина аниқлаш мумкин. Бундай одамларнинг устидан кулиш ўрнига шунчаки бир қизиқиш деб қараш ўринли, зеро, аслида ҳам шундай.