Қуёш энергияси борган сари кундалик ҳаётимизга кириб бормоқда. Кейинги пайтларда ушбу энергияга мослашган механизмлар тобора кўпайиб бормоқда. Экологик жиҳатдан тоза ва бунинг устига умуман шовқин чиқармайдиган ушбу энергияда яқин кунларга қадар майда жиҳозлар, айтайлик, калькулятор ёки соатлар ишлар эди. Қуёш энергиясига мослашган катта жиҳозлар, мисол учун, автомобиль ҳам бесўнақай, ҳам ҳаддан ташқари чиқимли бўлиб, атроф муҳитни ифлослантирадиган бензинли ёки дизелли машиналар билан умуман рақобатлаша олмасди. Тўғри, кейинги пайтларда мазкур энергияда ҳаракатланувчи автоларни ҳар қадамда кўриш мумкин, десак устимиздан ҳамма кулади, бироқ вазият аста-секин ижобий томонга ўзгараётгани аниқ. Бундан ташқари уйларни ёритишда ҳам қуёш нурларини сингдирадиган батареялардан фойдаланиш имкони туғилди. Шундай экан, ҳеч иккиланмай мазкур масалада муз жойидан кўчди, дейишга ҳамма асос мавжуд.

Германиялик муҳандислар ушбу соҳада яна бир катта қадам босишга муваффақ бўлишди. Қадамни ортга ҳам, четга ҳам босиш мумкин, деб мазах қиладиганлар орамизда топилмаса керак, деб ўйлаймиз. Бироқ бундайлар сафимизда топилиб қолгудек бўлса ҳам, шуни алоҳида таъкидламоқчимизки, биз фақат олға босилган қадамлар ҳақида сўз юритамиз. Ахир жойида ёки ортга босилган одимлар ҳақида сўзлаб ўтиришга не ҳожат?

Хуллас, немис муҳандислари қуёш батареяларида ишлайдиган дунёдаги энг катта кемани тақдим этишди. «Қуёш сайёраси», яъни Planet Solar Türanor деб номланган мазкур кема 30 метр узунликка ва 16 метр кенгликка эга. Унинг устки қисмидаги 500 квадрат метр майдонга қуёш фотоэлектрик панеллари ўрнатилди, улар кема двигателларини элетр энергияси билан таъминлаб бериши мўлжалланган.

«Қуёш сайёраси»нинг сувдаги илк синовлари март ойида ўтказилди. Кема Европанинг катталиги бўйича Роттердамдан кейинги иккинчи порти Гамбургнинг 821-йиллигини нишонлаш тантаналарида иштирок этиши кутилмоқда. У Гамбургдан чиқиб, Европа соҳилларини кезиб чиқади, сўнгра сайёрани айланиб ўтишга «бел» боғлайди. Унинг саёҳати экваторга яқин ўтиши керак, чунки батареялар қуёшнинг иложи борича кўпроқ нурларини олгани мақсадга мувофиқ. Умумий ҳисобда Planet Solar Türanor кемаси 140 кун давом этадиган саёҳати давомида 40000 км йўлни босиб ўтиши режалаштирилган.