Нима десангиз деяверингу лекин ўтмишда машинани ишлашни билишган. Ҳозирги автоларни қаранг: тўғри, кўриниши ажиб, қиёфаси антиқа, бироқ бирини бошқасидан тайинли ажрата билмайсиз. Пешонасидаги нишонини (уни ғалати сўз билан логотип деб номлашади) кўрмасангиз, қай бири фалончию қайсиниси пистончи эканини айтиш тим қоронғи тунда қоп-қора мушукни кўриш ва иложи бўлса, думидан тутиб олишдек мушкул. бунинг устига хитойликлар ҳам қўшилиб, «ксерокопия қилиш санъати»ни ишга туширишди ва аҳволни янада чалкаштириб юборишди.

Ўтмишда эса вазият тубдан ўзгача эди. Ҳар бир авторусумнинг ўз қиёфаси мавжуд – бир-бири билан алмаштириб юбориш мумкин эмас. Эҳ, замонлар...

Американинг Delahaye USA компанияси (номидан ҳам қайси давлатга тегишли эканлиги кўриниб турибди, чоғи) ҳам тарихий, оқсуякларнинг гапи билан айтганда, классик автомобилларга муккасидан кетган. Жорий йил августда Калифорниянинг Пэбл-Бичида ўтказиладиган классик автомобиллар кўргазмасида 1937 йил моделларидан бири Bugatti Type 57S машинасининг замонавий интерпретациясини тақдим этишни режалаштирган. Компания ўз «болакайини» Bugnotti Coupe деб номлади. Харидорлар, навбатга марҳамат, ахир машина сотувга чиқарилади. Нархи ҳам ҳақиқий оқсуякларга мўлжалланган: кузовига қараб «атиги» 250 мингдан 450 минг долларгача боради.