Автомобиль шунчаки ҳаракатланиш воситасидан аллақачон одамнинг ёрдамчиси ва темир дўстига айланиб улгурди, бу ўринда инсоннинг тарихий дўсти – итлар ҳам ип эшолмай қолди. Уйидаги кўппакларига қараганда тўрт ғилдиракли тулпорига кўпроқ эътибор берадиганлар анчагина. Буни тушунса ҳам бўлади: машинага эътибор бермаса, тезда шалдироғи чиқади – авто ҳам ярим рўзғор, дейдиганлар унги етарлича эътибор бермаган кўринади. Кейинги вақтларда машинанинг ташқи кўринишини ҳам ўзига хос қилишмоқдаки, бу унинг афзаллигини янада оширмоқда. Харидор диққатини қаратиш осон эмас – автомобиль оламида бу ҳикмат ўта долзарбдир. Қуйида бунга эришган ва «2009 йилнинг энг яхши автомобили» номини олган машиналарга тўхталамиз.

Европанинг 25 мамлакатидан йиғилган 59 журналист иштирок этадиган мазкур халқаро танловда Volkswagen Golf VI хэтчбеки ғолиб деб топилди. У финалда Ford Fiesta ва Toyota iQ машиналаридан ўзиб кетишга эришди, қолган 48 номзод эса аввалги босқичларда таслим бўлишганди. Энг яхши спорт машинаси деб Nissan GT-R суперкари тан олинди, у Chevrolet Corvette ZR1 ва Porsche 911 Carrera «дода» машиналарини ортда қолдирди. «2009 йилнинг энг яхши автомобиль дизайни» номзодлигида Jaguar XF, Toyota iQ ва Citroen C5 каби «тулпорларни» тутунида қолдирган Fiat 500 микролитражкаси устун келди. Аввал худди шу машина «Европанинг энг яхши машинаси» номини ҳам олганди.

Сўнгги вақтларда машиналар оламида «тежамкорлик» ва «экологик тоза» сўзларига улкан аҳамият берилмоқда. Ҳақиқатан ҳам ёнилғини «ямламай ютадиган» ва охирида «кекириб ҳам қўядиган» машиналар ўтмишда қолиб кетмоқда. Шундай экан нуфузли танловда «энг яшил», яъни экологик тоза машина номзодлигининг борлиги давр талаби. Бу тоифада жаҳондаги биринчи серияли чиқарилаётган водород автомобили Honda - FCX Clarity пешқадамликни қўлдан бермади. Номзодликни талашган Mitsubishi iMieV ва Toyota iQ автолари ҳеч вақосиз қолиб кетаверишди.

Манба: auto.lenta.ru