Электромобиль – келажак транспорти, аммо унинг қиёфасини яратишда ўтмишга назар ташлаш ҳам фойдадан холи эмас. Япониядаги Takayanagi компанияси ҳам худди шундай хулосага келган, шекилли. Ушбу компания томонидан ишлаб чиқилган Miluira бир ўринлик электромобили назар ташлар эканмиз, инновацион транспорт турида ретро услубидаги дизайнерлик ва конструктивлик қирралар қўлланилганига гувоҳ бўламиз. Шуни ҳам алоҳида таъкидлаш жоизки, Miluira концептуал лойиҳа эмас, ҳақиқатан ҳам ишлаб чиқариладиган маҳсулот бўлиб, бугунги куда унга буюртмалар қабул қилина бошланди.

Афсуски, ажиб электромобилни тайёрлашда ишлаб чиқарувчилар унинг ишлашига эмас, ташқи қиёфасига кўпроқ эътибор қаратишган. Тўлдирилган аккумулятор билан Miluira атиги 35 километр масофани босиб ўтиши мумкин, сўнгра уни қайта тўлдириш талаб этилади. «Тойчоқ» эришадиган энг катта тезлик эса соатига 60 километрни ташкил этади, холос. Бу жуда камлигини авто ва электромобиль оламидан йироқ бўлган сизу мен ҳам яхши англаб турибмиз. Бунинг устига аккумулятор тўлиқ заряд олиши учун нақд 12 соат талаб этилади.

Янги ишланманинг барча салбий жиҳатлари бир нарсага бориб тақалади – унда замонавий ион-литийли аккумуляторлар ўрнига «қадимий» қўрғошин-кислотали аккумулятор қўлланган – бу ҳам дизайнерларнинг «ретро» услубига ўзига хос ҳурмати эмиш. Miluira эгалари машинанинг ишлашидан эмас, кўпроқ эстетик жиҳатлари, ўтмиш ва замонавий ютуқларнинг уйғунлигидан баҳраманд бўлишлари кутилмоқда. Уни ишлаб чиқарувчилар уялмай-нетмай таъкидлашмоқдаки, электромобилнинг ишлаш қобилияти муҳим эмас, унинг чиройига қаранг, чиройига!

Ушбу янгиликка эга бўлишни истовчилар кейинги йил март ойигача кутишлари керак. Айнан шу даврда моделлар кетма-кет конвейердан туша бошлайди. Тўғри, машинани харид қилиш учун оз эмас, кўп эмас, нақд 75000 АҚШ долларидан воз кечиш зарур, аммо бу кимни ҳам ўйлантиради, дейсиз...