Голливуд фильмлари нуқтаи назаридан, келажакда биз, албатта, учар автомобилларда юришимиз керак. Шундоқ томга чиқамизу (учар автомобилларга ерда гаражга бало борми, бекорга жой эгаллаб, бунинг устига учиб кетиш қийин кечади) шартта машинага ўтириб, истаган жойимизга кетаверамиз. Хуллас, бу ғоя анча узоқ келажакда амалга ошмаса, шу кунларда унинг арвоғи ҳам кўринмаяпти. Бўлмасам, яқин келажакда қандай машиналарда юрамиз, деган савол туғилади.

Турлича рейтингларни тузишга устаси фаранг бўлган нуфузли нашрлардан бири Forbes (масалан, дунёдаги энг бадавлат одамларни ҳам айнан шу нашр овоза қилади) мутахассисларнинг башоратларига таянган ҳолда, яқин келажакда дунё йўллари бўйлаб энг кўп юрадиган автомобиллар рейтингини тузди.

Бундай автомобилларни аниқлашда бугунги куннинг асосий талаблари, мисол учун, электромобиллар ва гибридларга (ҳам бензин, ҳам электрга мослашган) эҳтиёж юқори эканлигидан келиб чиқилди. BMW, Ford и Mercedes каби энг йирик автомобиль ишлаб чиқарувчилар яқин йилларда шу йўналишдаги енгил двигателлар ишлаб чиқариш истагини билдиришган.

Беш эшикли Milano жорий йил сентябрь ойида Франкфурт автосалонида биринчи марта намойиш этилади. Мутахассисларнинг фикрича, Milano янги Крайслер седани учун асос бўлиб хизмат қилади. Автомобиль аввалига Европа бозорларига чиқади, сўнгра бутун дунёга тарқалади.

Х1 машинасида автогигантнинг Х линияси оффродерлари билан кичкина седанларнинг хусусиятлари уйғунлашган. Бундай автомобилнинг бозори чаққон бўлиши шубҳасиз.

Бу автога электродвигатель билан бирга 1 л ҳажмли 67 от кучига эга мотор ўрнатилган (умумий қуввати – 167 о.к.). Хитойда ишлаб чиқилган гибрид ўтган йилдан бошлаб Ватанида сотила бошлади. Лекин тез орада хорижий бозорларга чиқиши ҳам кутилмоқда. Масалан, 2011 йилга келиб, BYD компанияси АҚШга ҳам келиш ниятида. Ўтган йил сентябрь ойида машҳур инвестор Уоррен Баффет компания акцияларининг 10%ини харид қилган, шунинг учун бу автомобиллар Америка бозорига кириб келишидан манфаатдор ва бу йўлда қўлидан келганча ёрдам беради.

Келажакда Америка автомобилларининг ҳам ўз ўрни бор, албатта. Америка нашри бунга урғу бермай ўтиб кетолмасди. Спорт усулида ишланган мазкур модель GM компанияси томонидан ишланган Voltec номли электр технологияларини намойиш қилиш учун тайёрланди. Ёнилғи ўрнига 120 вольт қувватига эга бўлган электр тармоғидан 8 соат давомида “тўйиниб олса”, бас. Энг юқори тезлиги – 160 км/соат, қуввати эса – 120 кВт/соат. Агар Cadillac жаҳон бозорида Converj ёки унга ўхшаш машинани харидоргир қилишга муваффақ бўлса, ҳам шинам, ҳам арзон (ахир машина қимматроқ бўлса ҳам, ёнилғига талаб йўқ-ку) электромобилларни ишлаб чиқаришни йўлга қўйиши мумкин.

Fordнинг “ecoboost” технологияси бўйича ишлаб чиқилган C-Max кўп функционал модели 2003 йилдан бери Европада сотилмоқда. Бу Ford компаниясининг молиявий инқирозда омон қолиш учун ишлаб чиққан стратегиясининг бир қисми ҳисобланади.

Спорт услубидаги концепт. 140 от кучига эга гибрид, Honda Insight моделида қўлланилган аккумуляторда ишлайди. Автомобилнинг дизайни 80-йилларда ката шов-шувга эга бўлган CRХ моделини эслатади. Компания раҳбарлари CR-Z тежамли, арзон ва қулай машина бўлади, деб ваъда беришмоқда. Яқин беш йилда сотувга чиқиши мўлжалланган, ўшанда кўрамиз уларнинг ваъдаси қанчалик ҳақиқатга яқин эканлигини.

Кам литражли мазкур автомобилда «илғор экотехнологиялар ҳамда футуристик коммуникация ва кўнгилочар тизимлари» қўлланилган, дейишмоқда компания вакиллари. Харидорларнинг ундан «томи кетиб қолиши» турган гап эмиш.

MINI компаниясининг биринчи электромобили. 150 кВТ/соат қувватга эга бўлган мазкур «митти» 100 км/соат тезликкача атиги 8,5 секундда эришади. Энг юқори тезлиги 150 км/соат. Бир марта электрни «ютиб олиб», 250 км масофани босишга қодир. Crossman модели Clubmanга қараганда бир неча сантиметрга баландроқ бўлади. Агар ушбу модель муваффақият қозонгудек бўлса, MINI электротехнологияларни ривожлантиришга яна маблағ сарфлашга тайёр. Акс ҳолда...

Икки эшикли FT-EV (кўплаб ишлаб чиқариш режалаштирилган 2014 йилга келиб номи ўзгариши шубҳа уйғотмайди) Scion iQ платформасида қурилди ва кейинги йилдан бошлаб Японияда сотувга чиқариш мўлжалланган. Энг юқори тезлиги 112 км/соат.

Турбодизелли двигателга эга бўлган родстер. 1200 кг оғирликка, 180 от кучи қувватига ва 225 км/соатгача бўлган тезликка эга. Бу Volkswagenнинг ҳам тежамкор, ҳам қулай, ҳам шинам автомобиль ишлаб чиқаришга бўлган учинчи интилиши. Дастлабки иккитаси (ConceptR и EcoRacer), юмшоқ қилиб айтганда, ўхшамади. Лекин буниси ҳозирча мутахассисларга ёқиб қолган кўринади. Лекин сўнгги хабарларга қараганда, компания уни кўплаб ишлаб чиқаришни ҳали режалаштирганича йўқ.

Италияда "чинквеченто" деб номланган, ўтган асрнинг 50-йилларида ўта машҳур бўлган “қўнғизча” моделининг тўлиқ электрлаштирилган кўриниши. Бу Fiatнинг энг кўп сотилган автомашиналаридан бири ҳисобланади. Янги машинанинг дизайни Италиядаги Diesel кийимлар ишлаб чиқарадиган корхонаси билан биргаликда тайёрланган.